બાર જ્યોતિર્લિંગોમાં અગ્ર સ્થાન ધરાવતાં અને દેવાધિદેવ મહાદેવના પવિત્ર ધામ સોમનાથમાં આજે જાહેર હિસાબ સમિતિના અધ્યક્ષ જીતુભાઈ વાઘાણી તથા સમિતિના સભ્યોએ પાવન દર્શન કર્યાં હતા.
આ અવસરે પંડિતો દ્વારા સમિતિના તમામ સભ્યોનું મંદિર ટ્રસ્ટ તરફથી ઓમ નમઃ શિવાય લખેલા ઉપવસ્ત્ર, શાલ અને પ્રસાદીથી ભવ્ય સ્વાગત કરાયું હતું. બાદમાં સભ્યોએ ગંગાજળથી ભગવાન સોમનાથનું જળાભિષેક કરીને શિવપૂજન કર્યું હતું.
સદસ્યોએ મંદિર પરિસરમાં આવેલા હમીરજી ગોહિલના સ્તંભને નમન કરીને તેમની શૌર્યમય શહાદતનું સ્મરણ કર્યું હતું. તેમજ ગણપતિદાદા અને હનુમાનજી મહારાજના દર્શન કરીને સમાજમાં સદભાવના અને એકતાની સ્થાપનાની પ્રાર્થના પણ કરાઈ હતી.
આ અવસરે અધ્યક્ષ જીતુભાઈ વાઘાણીએ મીડિયા સાથે વાતચીતમાં જણાવ્યું કે, “જાહેર વહીવટમાં નાણાકીય શિસ્ત જળવાય એ માટે જાહેર હિસાબ સમિતિ નિષ્ઠાપૂર્વક કાર્યરત છે. રાજ્યમાં વિકાસના કામોમાં પારદર્શિતા રહે એ હેતુથી સમિતિ સમગ્ર રાજ્યના વિકાસકમોનું ગહન અવલોકન કરી રહી છે.”
તેમણે વધુમાં ઉમેર્યું કે, “ગયા બે વર્ષ દરમિયાન જાહેર હિસાબ સમિતિએ દેશભરમાં સૌથી વધુ કામગીરી કરનારી સમિતિ તરીકે પોતાની ઓળખ ઉભી કરી છે. અત્યાર સુધીમાં ૫,૦૦૦થી વધુ પેરાની તપાસ અને નિર્ણય થયેલ છે.”
તેમણે વડાપ્રધાન નરેન્દ્રભાઈ મોદી અને મુખ્યમંત્રી ભૂપેન્દ્ર પટેલના નેતૃત્વને સમગ્ર દેશ અને રાજ્યની પ્રગતિ પાછળનું મુખ્ય કરણ ગણાવતાં જણાવ્યું કે, “દેશ આજરોજ વિકાસના નવા આયામ સ્પર્શી રહ્યો છે. એવી શિવકૃપા સતત ભારત અને ગુજરાત પર بنی રહે તેવી પ્રાર્થના કરાઈ છે.”
આ ઉત્કૃષ્ટ મુલાકાત દરમિયાન પ્રખ્યાત લોકસાહિત્યકાર માયાભાઈ આહિર, જિલ્લા કલેક્ટર એન.વી. ઉપાધ્યાય, જનરલ મેનેજર વિજયસિંહ ચાવડા, ડૉ. સંજય પરમાર, માનસિંહ પરમાર સહિતના પદાધિકારીઓ અને અધિકારીઓ હાજર રહ્યા હતા.
અહેવાલ: પ્રકાશ કારાણી, વેરાવળ-સોમનાથ
