જુનાગઢ, તા.૩૧ – ચોમાસાની ઋતુમાં વોલન્ટીયરી બ્લડ ડોનેશનમાં નોંધપાત્ર ઘટાડો થયો છે, જેના પગલે જૂનાગઢની GMERS જનરલ હોસ્પિટલના બ્લડ સેન્ટર ખાતે ગંભીર લોહીની અછત સર્જાઈ છે. સામાન્ય દિવસોમાં દર મહિને ૮૦૦થી ૯૦૦ જેટલી બ્લડ બેગ્સ / ઘટકો જરૂરિયાતમંદ દર્દીઓમાં વિતરણ થાય છે, પરંતુ હાલમાં એ આવક ઘટી જવાથી દર્દીઓ સહિત થેલેસેમિયા-મેજર પીડાતા બાળકો અને સગર્ભા-ધાત્રી મહિલાઓને સમયસર લોહી મળવામાં મુશ્કેલીનો સામનો કરવો પડી રહ્યો છે.
GMERS બ્લડ સેન્ટરના તબીબી અધિક્ષકના જણાવ્યા અનુસાર, ચોમાસા દરમિયાન રક્તદાન કેમ્પનું આયોજન ઓછું થવાને કારણે બ્લડ સ્ટોક ખતમ થવાની નજીક છે. હોસ્પિટલમાં દરરોજ અનેક તાત્કાલિક ઓપરેશનો, દુર્ઘટના પીડિતો અને અન્ય ગંભીર દર્દીઓ માટે લોહીની જરૂરિયાત ઊભી રહેતી હોય છે. આ પરિસ્થિતિમાં લોહી એક માત્ર એવી વહેતી દવા છે જેને બનાવી શકાતી નથી – donating blood remains the only option.
આથી, જૂનાગઢ જિલ્લા નાગરિકો, યુવા ગ્રુપો તથા એનજીઓ સંસ્થાઓને અપીલ છે કે તેઓ આગળ આવી વધુમાં વધુ બ્લડ ડોનેશન કેમ્પનું આયોજન કરે. જેના માટે GMERS હોસ્પિટલ સંપૂર્ણ ટેકનિકલ સહાયતા આપી દેશે. સાથે સાથે જ્યાં પણ બ્લડ કેમ્પ યોજાય, ત્યાં યુવાનો અને સ્વસ્થ વ્યક્તિઓ સ્વૈચ્છિક રીતે રક્તદાન કરે તેવા પ્રયાસો કરવા જરુરી છે.
જ્યારે તમારું એક યુનિટ લોહી કોઈના જીવનને બચાવી શકે છે, ત્યારે રક્તદાન માત્ર સેવા નથી – તે માનવતા છે. GMERS બ્લડ સેન્ટર, જૂનાગઢ ખાતે ૨૪x૭ બ્લડ ડોનેશનની વ્યવસ્થા ઉપલબ્ધ છે. રક્તદાન ઈચ્છુક વ્યક્તિઓ અને સંસ્થાઓ માટે સ્પેશિયલ કેમ્પ પણ ગોઠવાઈ શકે છે.
આહ્વાન છે કે – ‘રક્તદાન મહાદાન’ ના આ પવિત્ર કાર્યમાં સૌ સાથે મળીને જીવન બચાવીએ.
અહેવાલ: નરેન્દ્ર દવે સાથે જગદીશ યાદવ, જૂનાગઢ.
