વેરાવળ, તા. 18 એપ્રિલ, 2025
વિકસિત ભારત-2047ના પાવન સ્વપ્નને સાકાર કરવાની દિશામાં આજે પીપળવા ગામથી જનજાગૃતિ અભિયાનની ઉદ્ઘાટન યાત્રાનો ભવ્ય પ્રારંભ થયો. આ યાત્રામાં લોકસહભાગિતા દ્વારા સ્વચ્છતા, જળસંચય, વૃક્ષારોપણ અને વ્યસનમુક્તિ જેવી જીવનપ્રેરક પહેલોને વેગ મળ્યો.
આ ઉદ્ઘાટન કાર્યક્રમમાં સાંસદ રાજેશભાઇ ચુડાસમા અને તાલાળાના ધારાસભ્ય ભગવાનભાઈ બારડ સહિત અનેક મહાનુભાવોએ હાજરી આપી. ધારાસભ્યના અધ્યક્ષસ્થાને યોજાયેલ કાર્યક્રમમાં ગ્રામજનોને વિવિધ અભિયાનો અંગે માહિતગાર કરવામાં આવ્યા.
વિશિષ્ટ મુદ્દાઓમાં –
- એક પેડ મા કે નામ,
- જળ સંચય અભિયાન,
- વ્યસન મુક્તિ,
- બેટી બચાવો – બેટી પઢાઓ,
- પ્રાકૃતિક ખેતી,
- પર્યાવરણ બચાવো જેવી પહેલોનો સમાવેશ કરવામાં આવ્યો.
સાંસદ શ્રી રાજેશભાઈ ચુડાસમાએ જણાવ્યું કે, “જનસહભાગિતા વિના વિકાસ અધૂરો છે. જ્યારે દરેક નાગરિક આત્મસાત ભાવથી જોડાય ત્યારે જ ખરું વિકાસ શક્ય બને છે.”
ધારાસભ્ય ભગવાનભાઈ બારડે જણાવ્યું કે, “ગુજરાત આજે વિકાસના પથ પર દોડે છે. જનજાગૃતિ અભિયાનના માધ્યમથી દરેક ગામડે વિકાસની નદી વહેતી કરવી છે.”
આ તકે ધારાસભ્ય દ્વારા આંગણવાડીના બાળકોને રમકડાની કીટ, ચકલીઓના માળાનું વિતરણ, તેમજ વૃક્ષારોપણ કાર્યક્રમનું પણ આયોજન કરવામાં આવ્યું. તેમજ એલ.ઈ.ડી. રથ મારફતે વિવિધ સરકારી અને સેવાકીય કાર્યો અંગે પણ લોકોને માહિતગાર કરવામાં આવ્યા.
તા. 18 થી 27 એપ્રિલ દરમિયાન આ અભિયાન હેઠળ કુલ 30થી વધુ ગામો આવરી લેવામાં આવશે જેમાં પ્રેમનગર, જશાધાર, શિરવાણ, ધણેજ, ભોજદે, મોરૂકા, ગુંદાળા, અને ઉમરેઠી સહિતના ગામોનો સમાવેશ થાય છે.
કાર્યક્રમ દરમિયાન જિલ્લા પંચાયત પ્રમુખ મંજૂલાબેન મૂછાર, પૂર્વ ધારાસભ્ય ગોવિંદભાઈ પરમાર, અગ્રણી સંજયભાઈ પરમાર, સરપંચ અને તાલુકા-જિલ્લા પંચાયતના અગ્રણીઓ તેમજ ગ્રામજનોની ઉમટતી ઉપસ્થિતિ રહી હતી.
અહેવાલ:
પ્રકાશ કારાણી – વેરાવળ
