સોમનાથ, તા. ૨૮ જુલાઈ ૨૦૨૫: શ્રાવણ માસના પવિત્ર પ્રથમ સોમવારના અવસરે સમગ્ર દેશમાંથી ઉમટી પડેલા હજારો ભક્તો સોમનાથ મહાદેવના દર્શનાર્થે વહેલી સવારે ધામ પર ઉમટ્યા હતા. હર હર મહાદેવના જયઘોષથી સોમનાથ મંદિર અને આસપાસનો વિસ્તાર ગુંજી ઉઠ્યો હતો. મંદિરે સવારે ૪ વાગ્યે દર્શનાર્થે દ્વાર ખોલાતા જ ભક્તોની દીર્ઘ કતારો લાગી ગઈ હતી.
હરિદ્વાર સહિતના સ્થળોથી કાવડ યાત્રા લઈ આવેલા ભક્તો, રાત્રીથી પગપાળા ચાલીને પધારેલા શ્રદ્ધાળુઓ, તેમજ આસપાસના પ્રદેશોથી પરિવારો સાથે આવેલા હજારો ભાવિકોએ ભગવાન શિવને પુષ્પ અર્પણ કરી શ્રાવણ સોમવારે મહાદેવના આશીર્વાદ મેળવ્યા હતા.
મંદિર પરિસરમાં સવારે ૮:૩૦ વાગ્યે વિશાળ પાલખી યાત્રાનું પણ આયોજન કરવામાં આવ્યું હતું. પાલખીમાં મહાદેવની વિશેષ મૂર્તિ સાથે જય જય કારના નાદ સાથે મંદિર પરિસરમાં ભવ્ય નગરચર્યા યોજાઈ હતી. આ સમયે જાણે પોતે મહાદેવ નગરચર્યાએ નીકળ્યા હોય તેવો ભવ્ય દ્રશ્ય સર્જાયો હતો.
શ્રાવણ માસમાં શિવજીના શ્રેષ્ઠ સોમવાર તરીકે ઉજવાતા દિવસના પાવન અવસરે અંદાજે સવારે ૧૫ હજાર જેટલા ભક્તોએ દર્શન કરી લીધાં હતા, જ્યારે દિવસભર દરમિયાન અંદાજે ૫૦ હજારથી વધુ ભક્તોના આગમનની શક્યતા વ્યક્ત કરવામાં આવી રહી છે. વેરાવળ અને આસપાસના ગામો સહિત રાજ્યભરના શ્રદ્ધાળુઓ માટે મંદિર અને ટ્રસ્ટ દ્વારા શ્રેષ્ઠ આયોજન કરવામાં આવ્યું છે.
મંદિર ટ્રસ્ટ તેમજ સેવાભાવી સંસ્થાઓ દ્વારા સમગ્ર પરિસરમાં શ્રદ્ધાળુઓ માટે ઠેર ઠેર પાણી, શરબત તથા પ્રસાદી વિતરણના સ્ટોલ ગોઠવવામાં આવ્યા છે. સુરક્ષા વ્યવસ્થા માટે પોલીસ તંત્ર, લોકલ વહીવટી તંત્ર અને મંદિર સંચાલકોની ટીમ સતત દેખરેખ રાખી રહી છે. ૨૪ કલાક તંત્ર તત્પર છે અને કોઈ પણ પ્રકારની અડચણ ન આવે તે માટે ચુસ્ત આયોજન કરવામાં આવ્યું છે.
આ અવસરે ગુજરાતના પૂર્વ નાયબ મુખ્યમંત્રી નીતિન પટેલ પણ સોમનાથ ધામ પધાર્યા હતા. તેમણે મહાદેવની પૂજા અર્ચના કરી આશીર્વાદ મેળવ્યા હતા તથા મંદિર વ્યવસ્થાપન અને વિકાસ અંગે ટ્રસ્ટના કાર્યક્રમોની પ્રશંસા પણ કરી હતી. મીડિયા સાથે વાતચીત કરતા તેમણે જણાવ્યું કે, “સોમનાથ ધામની સેવાઓ સતત સુધરતી જાય છે. સોમનાથ કોર્િડોર માટે પણ મુખ્યમંત્રી તેમજ વડાપ્રધાનશ્રીએ દૃઢ દ્રષ્ટિ અપનાવી છે. ધીમે ધીમે પવિત્ર ધામમાં આધુનિક સુવિધાઓ વિકસાવવામાં આવશે.”
સોમનાથ ટ્રસ્ટના અધ્યક્ષ તરીકે વડાપ્રધાન નરેન્દ્ર મોદી જોડાયેલા હોવાને કારણે મંદિરમાં અમુલચૂલ પરિવર્તન થઈ રહ્યું છે. કાશી વિશ્વનાથ અને મહાકાલેશ્વર મંદિરમાં જેવાં કોર્િડોર તૈયાર થયા છે, તેવી જ રીતે સોમનાથ માટે પણ ભવ્ય અને ભવિષ્યદ્રષ્ટિથી સમૃદ્ધ આયોજન આગળ વધી રહ્યું છે.
અહેવાલ: પ્રકાશ કારાણી, વેરાવળ – સોમનાથ
