ગુજરાતી અધ્યાપક સંઘ અને ડો. સુભાષ મહિલા કોલેજના સંયુક્ત ઉપક્રમે યોજાયેલી વિદ્યાવિસ્તાર વ્યાખ્યાનમાળામાં જાણીતા અધ્યતા, કવિ અને અનુવાદક ડો. ઉર્વીશ વસાવડાએ “નરસિંહના કાવ્યોમાં કૃષ્ણ તત્વ” વિષયક વ્યાખ્યાન આપ્યું હતું. તેમણે વ્યાખ્યાન દરમ્યાન જણાવ્યું કે, “કૃષ્ણ ભક્તિ એ નરસિંહની ઓળખ છે” અને તેમના પદોમાં છલકાતી ભક્તિભાવનાને પ્રકાશિત કરી હતી.
ઉપસ્થિત વિદ્યાર્થીઓ સાથે પ્રશ્નોત્તરી સંવાદ દ્વારા નરસિંહના જીવન, સમયકાળ અને દંતકથાઓ વિશે રસપ્રદ માહિતી આપી. સાથે જ ભક્તિકાવ્યની પરંપરામાં નરસિંહનું સ્થાન શું છે, એ મુદ્દે પણ ચર્ચા કરાઈ.
આ પ્રસંગે સંસ્થાના આચાર્ય બલરામ ચાવડાએ સૌનું સ્વાગત કરતા શિક્ષણમાં પ્રશ્ન પુછવાની સંસ્કૃતિના મહત્વ પર ભાર મૂક્યો હતો. તેમણે આર્ય સમાજી વિચારો અને પેથલજીભાઈના આદર્શોને યાદ કરતાં શૈક્ષણિક ઉન્નતિ માટે સંસ્થાની પ્રતિબદ્ધતાની ભૂમિકા રજૂ કરી.
વિશિષ્ટ વક્તા તરીકે ઉપસ્થિત ડો. રાજેશ રૂપારેલિયાએ કળા અને સાહિત્યના સંબંધની ચર્ચા કરતાં કહ્યું કે “કલા એ પુનઃસર્જન છે” અને માનવ કલ્પના શક્તિથી કળાનું સર્જન શક્ય બને છે.
કવિતા વિવેચક ડો. રમેશ મહેતાએ “સિગ્નેચર પોએમ્સ” વિષયે રસભરી વાત કરીને કાવ્યતત્ત્વના મર્મ પર પ્રકાશ પાડ્યો. એમણે કહ્યું કે, “કવિતાથી માણસ કદી દૂર થઈ શકે નહીં – કવિતા શાશ્વત છે.”
કાર્યક્રમની શરૂઆતમાં કુ. મિતલ માકડીયાએ નરસિંહના પદગાન દ્વારા સૌને ભક્તિમય બનાવી દીધા હતા. વક્તાઓનું પુષ્પગુચ્છથી સ્વાગત અને દીપપ્રાગટ્ય વિધિ સાથે પૂજ્ય પેથલજીભાઈને શ્રદ્ધાંજલિ પણ આપવામાં આવી હતી.
આ વિખરાયેલા જ્ઞાનમેળાને સફળ બનાવવા સંસ્થાના વડા જવાહરભાઈ ચાવડા, મીતાબેન ચાવડા અને રાજ ચાવડાએ માર્ગદર્શન આપ્યું હતું. સમગ્ર કાર્યક્રમનું સંચાલન ડો. કૌશિકરાય પંડ્યા અને સમાપન પ્રા. અશોક રાબડીયાએ કર્યું હતું.
વિશિષ્ટ સહકાર માટે પ્રોફેસર ડો. જે.એમ. ચંદ્રવાડીયા અને અધ્યાપક સંઘના હોદ્દેદારોએ વિશેષ ઉમાળો દર્શાવ્યો હતો.
📌 અહેવાલ:
નરેન્દ્ર દવે સાથે જગદીશ યાદવ, જૂનાગઢ
