કોડીનાર: રાજ્યપાલ શ્રી આચાર્ય દેવવ્રતજી અને મુખ્યમંત્રી ભૂપેન્દ્રભાઈ પટેલના દિશાનિર્દેશન હેઠળ ગુજરાતમાં પ્રાકૃતિક કૃષિને વેગ અપાવાની દિશામાં રાજ્યભરમાં વિવિધ કાર્યોથી જાગૃતિ ફેલાવવામાં આવી રહી છે. આ સંદર્ભે ગીર સોમનાથ જિલ્લાના કોડીનાર સ્થિત કૃષિ વિજ્ઞાન કેન્દ્ર પણ મહત્વની ભૂમિકા ભજવી રહ્યું છે.
તાજેતરમાં કોડીનારના કે.ડી. બારડ હાઈસ્કૂલના લગભગ 150 વિદ્યાર્થીઓએ કૃષિ વિજ્ઞાન કેન્દ્રની મુલાકાત લીધી હતી, જ્યાં તેમને પ્રાકૃતિક ખેતીના વિવિધ તબક્કાઓ અને પદ્ધતિઓ વિશે તદ્દન વ્યવહારુ માર્ગદર્શન આપવામાં આવ્યું.
વિદ્યાર્થીઓને જીવનસભર માટી સંરક્ષણ, નિમજડિત બીજ ઉપયોગ, જીવામૃત અને બીજામૃતનો ઉપયોગ, વાપસા પદ્ધતિથી સિંચાઈ, પાક માટે જંતુનાશક તરીકે દશપર્ણી અર્ક, બ્રહ્માસ્ત્ર, નિમાસ્ત્ર અને અગ્નિઅસ્ત્ર જેવી પ્રાકૃતિક દવાઓના નિર્માણ અને ઉપયોગ વિશે માહિતી મળી. સાથે જ રાસાયણિક દવાઓથી થતી નુકસાની અને પ્રાકૃતિક પદ્ધતિથી કેવી રીતે પાકનું આરોગ્યમય સંરક્ષણ થઈ શકે છે તેની સમજૂતી પણ આપી.
કૃષિ વિજ્ઞાન કેન્દ્રની કૃષિ વિસ્તરણ વિષય નિષ્ણાત પૂજાબેન નકુમ દ્વારા સમગ્ર માર્ગદર્શન પૂરું પાડવામાં આવ્યું હતું. તેમણે બાળકોને ખેડૂતોના ભવિષ્ય માટે પ્રાકૃતિક ખેતીનું મહત્વ સમજાવ્યું અને તેમણે પૂછેલ પ્રશ્નોના સરળ ભાષામાં જવાબ આપ્યા.
વિદ્યાર્થીઓમાં ખેતી પ્રત્યે રસ અને ભાવના ઊભી કરવા માટે અને પર્યાવરણીય સંતુલન જળવાઈ રહે તે હેતુસર આ પ્રકારની શૈક્ષણિક મુલાકાતો મહત્વની સાબિત થાય છે.
અહેવાલ – પ્રકાશ કારાણી, વેરાવળ-સોમનાથ
