ગાંધીનગર ખાતે ગુજકોમાસોલ અને એમ.એન.જી, જોર્ડનના સંયુક્ત ઉપક્રમે ઓર્ગેનિક ખેતી પરિસંવાદ યોજાયો, જેમાં ઈફકોના ચેરમેન દિલીપ સંઘાણી, ગુજકોમાસોલના વાઈસ ચેરમેન બિપીનભાઈ ગોતા, એમ.એન.જી કંપનીના વૈજ્ઞાનિક ડો. વિકટર, સીઈઓ દિનેશભાઈ સુથાર, ભરતભાઈ પટેલ સહિતના ખેતી અને ઉદ્યોગ જગતના અગ્રણીઓ ઉપસ્થિત રહ્યા.
ઓર્ગેનિક ખેતીની જરૂરિયાત:
દિલીપ સંઘાણીએ પરિસંવાદમાં ઓર્ગેનિક ખેતીની મહત્તા પર ભાર મુકતા જણાવ્યું કે, બિનરાસાયણીક ખેતી આજે ખૂબ જરૂરી બની ગઈ છે. ઓર્ગેનિક ખેતી પદ્ધતિથી માટી ફળદ્રુપ રહે છે, પાકની ગુણવત્તા સુધરે છે, અને પર્યાવરણ અનુકૂળ ખેતી શક્ય બને છે. તેઓએ પ્રધાનમંત્રી નરેન્દ્ર મોદીની ખાતર ક્ષેત્રે આત્મનિર્ભરતાની પહેલનો ઉલ્લેખ કરતા જણાવ્યું કે, ભારત હવે રાસાયણિક ખાતરના બદલે ઓર્ગેનિક ખાતર તરફ વળવા તૈયાર છે.
ઓર્ગેનિક ખાતરના ફાયદા:
પરિસંવાદ દરમિયાન ઓર્ગેનિક ખાતર અને ટેકનિકલ ખેતી પદ્ધતિઓ વિશે વિસ્તૃત ચર્ચા કરવામાં આવી. હવાલા આપવામાં આવ્યું કે ઓર્ગેનિક ખાતરનો ઉપયોગ કરતા જમીન શુદ્ધીકરણ થાય છે, ઉત્પાદન ક્ષમતા વધે છે, અને ઓછા સમયમાં બે પાક પણ લેવામાં આવે છે.
ખેડૂતો માટે નવો વિકલ્પ:
ખેડૂતો માટે “એમ.એન.જી ઉત્પાદિત ઓર્ગેનિક ટેકનિકલ ખાતર” કેવું અસરકારક સાબિત થઈ શકે તે અંગે પણ ચર્ચા કરવામાં આવી. દિલીપ સંઘાણીએ કૃષિ ખર્ચ ઘટાડીને વધુ ઉત્પાદન મેળવવા ઓર્ગેનિક પદ્ધતિ અપનાવવા ખેડૂતોને પ્રોત્સાહિત કર્યા.
સહકારની ભૂમિકા:
તેમણે એ પણ જણાવ્યું કે, સામૂહિક ઉત્પાદન અને સહકારથી ખેતી માટે વધુ સમૃદ્ધિ લાવવામાં મદદ મળે છે. ગુજરાતમાં આ નવું ટેકનિકલ ઓર્ગેનિક ખાતર ખેડૂતો સુધી પહોંચાડવા માટે સરકાર અને સહકારી સંસ્થાઓ સાથે સંકલન કરીને યોગ્ય આયોજન કરવામાં આવશે.
વિશિષ્ટ ઉપસ્થિતિ:
આ કાર્યક્રમમાં વિજ્ઞાન અને ખેતી ઉદ્યોગ સાથે જોડાયેલા ઘણા મહાનુભાવો ઉપસ્થિત રહ્યા, જેમણે ઓર્ગેનિક ખેતીના લાભો અને એ માટેની ભવિષ્યની તકનીકી પ્રગતિ અંગે વિચારો વહેંચ્યા.
આ પરિસંવાદ દ્વારા, ખેડૂતોએ ઓર્ગેનિક ખેતી તરફ વળીને, વધુ ઉત્પાદન સાથે પર્યાવરણ અને જમીનનું રક્ષણ કરવા નવી દિશા અપનાવવાની તક મેળવી છે.
અહેવાલ: નરેન્દ્ર દવે સાથે જગદીશ યાદવ, જૂનાગઢ
