અમદાવાદ: લોકસાહિત્ય જગતમાં લોકપ્રિય ગાયક દેવાયત ખવડ ફરી એકવાર ચર્ચામાં છે. શુક્રવારે (21 ફેબ્રુઆરી) તેમની ગાડી પર થયેલા હુમલાને લઈને અનેક અટકળો ચાલી રહી છે. ગાડી પર હુમલાના સંબંધમાં ચર્ચા થઈ રહી છે કે દેવાયત ખવડએ ડાયરા માટે આયોજકો પાસેથી રૂપિયા લીધા હોવા છતાં પ્રોગ્રામમાં હાજરી આપી નહતી, જેના કારણે આયોજકોમાં રોષ પેદા થયો અને તેમની ગાડી પર હુમલો થયો.
હાલ દેવાયત ખવડએ આ મામલે પોતાનું મૌન તોડ્યું છે અને સોશિયલ મીડિયા પર પોસ્ટ કરીને સ્પષ્ટતા આપી છે.
દેવાયત ખવડએ શું કહ્યું?
સોશિયલ મીડિયા પર દેવાયત ખવડએ આ મામલે ખુલાસો કરતાં જણાવ્યું કે,
“હાલ એવી ગેરસમજ ફેલાઈ રહી છે કે, મેં બે ડાયરા માટે ચૂકવણી લીધી હતી, પરંતુ એકમાં હાજરી આપી અને બીજા ડાયરામાં ગયો જ નહીં. હું આ સંપૂર્ણ રીતે ખોટું હોવાનું જાહેર રીતે સ્પષ્ટ કરું છું.”
તેમણે વધુમાં જણાવ્યું કે,
“જે ડાયરો સનાથલ ખાતે યોજાયો હતો, તેમાં મેં 8:00 થી 9:30 સુધી પરફોર્મ કર્યું હતું. તે બાદ મેં આયોજકની પરવાનગી લઈને પીપળા ખાતેના બીજા ડાયરામાં હાજરી આપવા રવાના થયો હતો. જો કોઈને શંકા હોય, તો સનાથલ આયોજકોના સીસીટીવી ફૂટેજ ચેક કરી શકાય છે, જ્યાં મારી હાજરીનો પુરાવો મળશે.”
દેવાયત ખવડએ ઉમેર્યું કે,
“આયોજકો સાથે મારી સારી જાણ-ઓળખ છે. હું અગાઉ પણ તેમના ભત્રીજાના લગ્નમાં કોઈ પણ રકમ લીધા વગર સ્નેહભાવથી ડાયરો કરી ચૂક્યો છું. હું મારા કૅરિયર દરમિયાન ક્યારેય કોઈને છેતર્યો નથી, અને ભવિષ્યમાં પણ સમ્માનપૂર્વક કામ કરવા માંગું છું.”
ગાડી પર થયેલા હુમલાનો મામલો શું છે?
શુક્રવારે (21 ફેબ્રુઆરી) દેવાયત ખવડની કાર પર હુમલાની ઘટના બની હતી, અને ત્યાર બાદ તેમની કાર ગાયબ થઈ ગઈ હતી. આ ઘટનાને લઈને અટકળો ચાલી રહી છે કે, સનાથલ ડાયરા માટે ચૂકવણી લીધા બાદ હાજરી ન આપતા આયોજકોમાં નારાજગી પેદા થઈ અને ત્યાર બાદ ગાડી પર હુમલો થયો.
આ મામલે પોલીસ ફરિયાદ નોંધાઈ ગઈ છે, જેમાં સનાથલ ગામના બે અને સાણંદના એક શખ્સ સામે કાર્યવાહી કરવા માટે પોલીસ સમક્ષ રજૂઆત કરવામાં આવી છે. હાલ પોલીસ સમગ્ર ઘટનાની તપાસ કરી રહી છે, અને વધુ વિગતો પોલીસ તપાસ બાદ બહાર આવશે.
“હું નિર્દોષ છું, મને ખોટી રીતે દોષી ઠેરવશો નહીં” – દેવાયત ખવડ
દેવાયત ખવડએ સમગ્ર ઘટનાને લઈને વધુ સ્પષ્ટતા કરતા કહ્યું,
“હું કોઈ કાનૂની કાર્યવાહીનો સામનો કરવાનું તૈયાર છું, પણ હું લોકોને વિનંતી કરું છું કે, કોઈ પણ ખોટી ગેરસમજ ન રાખે. આ ક્ષેત્રમાં કામ કરવું એ સન્માનની વાત છે, અને હું ભવિષ્યમાં પણ સમર્પણભાવથી કામ કરતો રહીશ.”
હવે જોવું રહ્યું કે આ મામલે પોલીસ તપાસ ક્યાં સુધી પહોંચે છે અને દેવાયત ખવડ ની નિર્દોષતા સાબિત થાય છે કે નહીં.
અહેવાલ: ગુજરાત બ્યુરો
