ગરિમા પુલ દુર્ઘટના બાદ રાજ્યભરના તમામ પુલોની તાકીદે ચકાસણી કરવાનો નિર્દેશ રાજ્યના મુખ્યમંત્રી ભૂપેન્દ્ર પટેલે આપ્યો છે. આ અનુસંધાનમાં ગીર સોમનાથ જિલ્લાના કલેક્ટર એન.વી. ઉપાધ્યાયે છેલ્લા બે દિવસથી જિલ્લાની અંદરના મહત્વના અને જૂના પુલો તથા વરસાદમાં નુકસાનગ્રસ્ત બનેલા રસ્તાઓનું રૂબરૂ નિરીક્ષણ કર્યું છે.
કલેક્ટરે પેઢાવાડા અને સીમાસી સહિત વિવિધ ગામોના પુલોની મુલાકાત લીધી હતી. તેઓએ માર્ગ મકાન વિભાગના અધિકારીઓને તાત્કાલિક સ્ટ્રક્ચરલ ચકાસણી કરવાની સૂચના આપી અને જ્યાં ખતરાની શક્યતાઓ હોય ત્યાં તાત્કાલિક પગલાં લેવા સૂચન કર્યું.
જિલ્લામાં પુલોની સ્થિતિ જોતા કેટલાંક પુલો પર ભારે વાહનોના પ્રવેશ પર પ્રતિબંધ મુકવામાં આવ્યો છે. જેમાં કોડીનાર-જામવાળા, ઉના-ગીરગઢડા, બેડીયા-કંટાળા, રાવલ અને તુલસીશ્યામ રોડના પુલોનો સમાવેશ થાય છે. અહીં હવે ૭૫૦૦ કિલો કરતા વધારે વજન ધરાવતા વાહનો અને શાળાના ટ્રાન્સપોર્ટ વાહનોનો પ્રવેશ બંધ કરવામાં આવ્યો છે.
પ્રશાસને આ પ્રકારના પુલો માટે વૈકલ્પિક રૂટ પણ નક્કી કર્યા છે જેથી સામાન્ય વાહન વ્યવહારને અડચણ ન થાય અને કોઈ જાનહાનિ ન થાય તે સુનિશ્ચિત બને.
અહેવાલ: પ્રકાશ કારાણી, વેરાવળ-સોમનાથ.
