જૂનાગઢ:
વિસાવદર વિધાનસભા પેટા ચૂંટણી માટે EVM અને VVPAT મશીનો સુરક્ષિત રીતે વિસાવદર ખાતેના સ્ટ્રોંગ રૂમમાં પહોંચાડવામાં આવ્યા છે. આ કામગીરી જિલ્લા ચૂંટણી અધિકારી અને કલેકટર અનિલકુમાર રાણાવસિયાની અધ્યક્ષતામાં પારદર્શક રીતે કરી લેવામાં આવી હતી.
જિલ્લા ચૂંટણી અધિકારી અનિલકુમાર રાણાવસિયાના માર્ગદર્શન હેઠળ રાજકીય પક્ષોના પ્રતિનિધિઓની ઉપસ્થિતિમાં EVM-VVPATનું પ્રથમ રેન્ડમાઈઝેશન યોજાયું. તેમાં ૮૭- વિસાવદર વિધાનસભા બેઠક માટે ૨૯૪ મતદાન મથકો માટે ૧૩૦ ટકા EVM અને ૧૪૦ ટકા VVPAT મશીનો ફાળવાયા.
આ ફાળવણી માનવીય હસ્તક્ષેપ વિના કોમ્પ્યુટર સોફ્ટવેર દ્વારા કરવામાં આવી, જે ચૂંટણી પ્રક્રિયાના પારદર્શકતાને વધુ મજબૂત બનાવે છે.
EVM અને VVPAT મશીનો GPS સાથે સંકળાયેલા વાહનોમાં લઇને જૂનાગઢના ઇવીએમ વેરહાઉસ ખાતેથી વિસાવદર સ્ટ્રોંગ રૂમમાં સુરક્ષિત રીતે મુકવામાં આવ્યા છે.
મોટા ભાગે ૩૮૨ બેલેટ યુનિટ અને તેટલાં જ કંટ્રોલ યુનિટ તેમજ ૪૧૧ VVPAT મશીનો ફાળવાયા છે. આ આયોજનથી મતદાન પ્રક્રિયા સ્વચ્છ અને સુરક્ષિત રીતે પૂરું પાડવામાં આવશે એવી અપેક્ષા છે.
અહેવાલ : નરેન્દ્ર દવે સાથે જગદીશ યાદવ, જુનાગઢ
