જુનાગઢ બી-ડિવિઝન પોલીસ સ્ટેશન વિસ્તારમાં નોંધાયેલ ટીવી ચોરીના ગુનામાં સંડોવાયેલા આરોપીની ઝડપી ધરપકડ કરવામાં આવી છે. આ કામગીરી જુનાગઢ “એ” ડિવિઝન પોલીસના સતર્ક સ્ટાફ દ્વારા બાતમીના આધારે સફળતાપૂર્વક અંજામ આપવામાં આવી હતી.
જુનાગઢ રેન્જના પોલીસ મહાનિરીક્ષક શ્રી નિલેશ જાજડિયા સાહેબ તથા જિલ્લા પોલીસ અધિક્ષક શ્રી સુબોધ ઓડેદરા સાહેબના માર્ગદર્શન હેઠળ મળેલી સુચના મુજબ મિલકત વિરુદ્ધના ગુનાઓ સામે કડક કાર્યવાહી કરવામાં આવી રહી છે. એ અનુસંધાને, નાયબ પોલીસ અધિક્ષક હિતેષ ધાંધલ્યા સાહેબના માર્ગદર્શન હેઠળ જુનાગઢ એ ડિવિઝન પોલીસ સ્ટેશનના ઇન્સ્પેકટર આર.કે. પરમાર તથા તેમની ટીમ દ્વારા ચોરીના ગુનાઓ સામે સતત નજર રાખવામાં આવી રહી છે.
ચોરીના ગુનાની તપાસ દરમ્યાન, પોલીસ કોન્સ્ટેબલ અજયસિંહ ચુડાસમા, કલ્પેશભાઇ ગેલા અને જયેશભાઇ કરમટા પેટ્રોલીંગ દરમિયાન બાતમી મળતાં તરતજ સ્થળ પર પહોંચ્યા હતા. બાતમી અનુસાર સ્વામી વિવેકાનંદ શાળાના નજીક એક શખ્સ ટીવી લઇને ફરી રહ્યો હતો. તપાસ કરતાં આરોપી નीरવભાઈ સુધીરભાઈ ટીલવા (ઉ.વ. ૩૦, રહે. નવાગામ ગરબી ચોક, તા. વંથલી, જી. જુનાગઢ) મળી આવ્યો હતો. પુછપરછ કરતાં તેણે કબૂલાત આપી હતી કે તેણે લગભગ ચારથી પાંચ દિવસ પહેલા જુનાગઢ કોર્ટ વિસ્તારમાંથી ટીવીની ચોરી કરી હતી.
પોલીસે આરોપી પાસેથી V.U. કેલિફોર્નિયા કંપનીનું 43 ઇંચનું એલસીડી ટીવી કિંમત રૂ. 25,000/- કબજે કર્યું હતું અને તેને વધુ કાર્યવાહી માટે જુનાગઢ બી-ડિવિઝન પોલીસ સ્ટેશનને સોપી દેવાયો હતો.
આ સફળ કામગીરીમાં પો.ઇન્સ્પેકટર આર.કે.પરમાર, એ.એસ.આઈ. બીએ રવૈયા, પંકજભાઈ સાગઠીયા, પો.હેડકોન્સ. તેજલબેન સિંધવ, પો.કોન્સ્ટેબલ કલ્પેશભાઈ ચાવડા, નીતીનભાઈ હીરાણી, જિગ્નેશભાઈ શુકલ, જયેશભાઈ કરમટા, અજયસિંહ ચુડાસમા, નરેન્દ્રભાઈ બાલસ અને જવાનભાઈ લાખણોત્રાએ સહભાગી રહીને ઉત્કૃષ્ટ કામગીરી انجام આપી હતી.
અહેવાલ : નરેન્દ્ર દવે સાથે જગદીશ યાદવ, જુનાગઢ
