જૂનાગઢ શહેરના ભવનાથ વિસ્તારમાં આંબા ભગતની જગ્યા પર આજે ભાજપ મહાનગરની વિશિષ્ટ ટિફિન બેઠક યોજાઈ હતી. આ કાર્યક્રમ ભારતીય જનતા પાર્ટી જુનાગઢ મહાનગરના અધ્યક્ષ ગૌરવભાઈ રૂપારેલિયાની અધ્યક્ષતામાં યોજાયો હતો, જેમાં જુનાગઢ વિધાનસભાના ધારાસભ્ય સંજયભાઈ કોરડીયા મુખ્ય મહેમાન તરીકે ઉપસ્થિત રહ્યા હતા.
આ ટિફિન બેઠક માત્ર પાર્ટી કાર્યકરો માટેનો સામૂહિક ભોજન સમારોહ ન રહી, પરંતુ તેમાં સંગીતમય સાંજ પણ જોડી દેવામાં આવી હતી. શહેરના જાણીતા ગાયક બેલીમભાઈ અને તેમની ટીમ દ્વારા સુપ્રસિદ્ધ હિન્દી ગીતો અને લોકપ્રિય રાસ-ગરબા રજૂ કરવામાં આવ્યા હતા, જેને કાર્યકરો દ્વારા ખૂબ જ ઉત્સાહથી માણવામાં આવ્યા હતા.
ટિફિન બેઠકનો મુખ્ય ઉદ્દેશ કાર્યકરોને એકતાબદ્ધ કરવા, સંગઠનની શક્તિ વધુ મજબૂત બનાવવી અને સહભાગિતાથી સકારાત્મક વાતાવરણ ઊભું કરવો હતો. રાત્રિના મોડા સુધી કાર્યકરોની હાજરી અને રાસના પગલાઓએ ઉજવણીના માહોલને પરિપૂર્ણ કર્યો હતો.
કાર્યક્રમમાં સ્ટેન્ડિંગ કમિટી ચેરપર્સન પલ્લવીબેન ઠાકર, ભાજપના આગેવાન અને હોદેદારો જેમકે ગીરીશભાઈ કોટેચા, લીલાભાઈ પરમાર, માલદેભાઈ ડોડીયા, ઓમભાઈ રાવલ, ભરતભાઈ કારેણા, યોગીભાઈ પઢીયાર, શેલેષભાઈ દવે, કે.ડી. પંડ્યા, મનોજભાઈ પોપટ, સંજયભાઈ મણવર સહિતના આગેવાનો ઉપસ્થિત રહ્યા હતા.
ઉપસ્થિત મહેમાનોમાં ભાજપ મહિલા મોરચાની અગ્રણીઓ જેમ કે ગીતાબેન પરમાર, ભાવનાબેન વ્યાસ, કનકબેન વ્યાસ, રાણીબેન પરમાર, સોનલબેન પનારા, વંદનાબેન દોશી, જ્યોતિબેન વાડોલીયા અને વોર્ડ પ્રમુખો, યુવા મોરચાના હોદેદારો તથા પાર્ટીના વિવિધ મંડળોના કાર્યકરો હાજર રહ્યા હતા.
સમગ્ર કાર્યક્રમ ભાજપના મિડિયા વિભાગના સંજય પંડ્યાના સંકલન અને માર્ગદર્શન હેઠળ સુયોજિત રીતે સંપન્ન થયો હતો. આ બેઠક રાજકીય કાર્યક્રમ હોવા છતાં સંગીત, સ્નેહ અને સંગઠન શક્તિનું પ્રતિક બની રહી હતી. ધારાસભ્ય સંજયભાઈ કોરડીયા અને મહાનગર અધ્યક્ષ ગૌરવભાઈ રૂપારેલિયાએ કાર્યક્રમમાં હાજર તમામ કાર્યકરોનો આભાર માન્યો હતો અને ભવિષ્યમાં આવી વધુ બેઠક યોજવાનું સંકેત પણ આપ્યું હતું.
અહેવાલ : નરેન્દ્ર દવે સાથે જગદીશ યાદવ, જૂનાગઢ
