જૂનાગઢ
જૂનાગઢ જિલ્લાનાં તમામ તાલુકામાં ખેડુતોએ તેમનાં ખેતરોમાં અનુકુળતા અનુસાર વિવિધ પાકનું વાવેતર કાર્ય પૂર્ણ કર્યુ છે. જે ખેડુતોએ પોતાનાં ખેતરમાં કપાસનું વાવેતર કર્યુ છે. તેમનાં પાકમાં મોલોમસી અને તડતડીયાનાં રોગની અસર દેખાવાની શરુઆત થતી જોવા મળે તો જૂનાગઢ જિલ્લા પંચાયતના ખેતિવાડી શાખા દ્વારા ખેડુતોને આ રોગનાં નિયંત્રણ માટે કેટલાક પગલા સૂચવવામાં આવ્યા છે. મોલોમશી તથા તડતડીયાનાં જૈવિક નિયંત્રણ માટે પરભક્ષી લીલી પોપટી (ક્રાયસોપા) ની ૨ થી ૩ દિવસની ઇયળો હેકટરે ૧૦,૦૦૦ ની સંખ્યામાં ૧૫ દિવસના ગાળે બે વખત છોડવી. લીમડાનાં મીંજનું પ% નું દ્રાવણ અથવા એઝાડીરેકટીન જેવી બિનરાસાયણિક તત્વ ધરાવતી ૧૫૦૦, ૩,૦૦૦ કે ૧૦,૦૦૦ પી.પી.એમ. અનુક્રમે ૫ લી, ૨.૫ લી કે ૭૫૦ મી.લી. પ્રતિ હેકટરે ઉપયોગ કરવો.
મોલોમશી, સફેદમાખીની જીવાતના ઉપદ્રવના પૂર્વ અનુમાન માટે હેક્ટરે ૫ થી ૬ સ્ટીકી ટ્રેપ ગોઠવવી. સફેદમાખીના નિયંત્રણ માટે એઝાડીરેકટીન ૧૫૦૦ પી.પી.એમ. ૫૦ મી.લી. ૧૦ લીટર પાણીમાં, કપડા ધોવાના સોડા ૫ ગ્રામ સાથે ૧૦ લીટર પાણીમાં ભેળવી છંટકાવ કરવો, ફૂગજન્ય જૈવિક જંતુનાશક દવા જેવી કે વર્ટીસીલીયમ લેકાની અથવા બુવેરીયા બાસીયાના ૪૦ ગ્રામ ૧૦ લીટર પાણીમાં પાકની શરૂઆતની અવસ્થાએ વાતાવરણમાં ભેજ હોય ત્યારે છંટકાવ કરવો, આ જૈવિક દવાઓ રાસાયણિક દવાઓ સાથે પણ વાપરવા. મીલીબગનો વધુ ઉપદ્રવ હોય તો કેરોસિનવાળા પાણીમાં અર્ધ કે આખા ખુલેલા જીંડવાઓ ખંખેરી રુપલાં ભેગા કરી નાશ કરવો અથવા છોડ હલાવી અને બે છેડેથી દોરડું પકડી હારમાં ઝડપથી ચાલવાથી આ રુપલાઓને નીચે પાડી નાશ કરી શકાય છે. મોલોમશી, તડતડિયા અને થ્રિપ્સના નિયંત્રણ માટે લીમડાના બનાવટની દવા ૧% ૨૫ મીલી, બ્યુવેરિયા બેસિયાના ૬૦ ગ્રામ,, વધુમાં દવાના વપરાશ વખતે દવા ઉપર આપવામાં આવેલા લેબલ મુજબ જે-તે પાક માટે, આપવામાં આવેલા ડોઝ અને જે તે રોગ-જીવાત માટેની દવા છે, તે ભલામણ મુજબ અનુસરવી. આ અંગે વધુ વિગતો જે-તે વિસ્તારના ગ્રામસેવક, વિસ્તરણ અધિકારી, ખેતી અધિકારી, તાલુકા અમલીકરણ અધિકારી, મદદનીશ ખેતી નિયામક, જિલ્લા ખેતીવાડી અધિકારી, નાયબ ખેતી નિયામક(વિસ્તરણ), નાયબ ખેતી નિયામક(તાલીમ)નો સંપર્ક કરવો, તેમ જિલ્લા પંચાયતની ખેતીવાડી શાખાના જિલ્લા ખેતીવાડી અધિકારીશ્રીએ એક યાદીમાં અનુરોધ કરતા જણાવ્યું છે.
અહેવાલ :- નરેન્દ્ર દવે સાથે જગદીશ યાદવ (જૂનાગઢ)
