જૂનાગઢ, તા.૧ સપ્ટેમ્બર – યુવાનોમાં સાહસિક ભાવના વિકસે અને શારીરિક-માનસિક ક્ષમતાનો સર્વાંગી વિકાસ થાય તે માટે કમિશનર, યુવક સેવા અને સાંસ્કૃતિક પ્રવૃત્તિઓ, ગાંધીનગર દ્વારા દર વર્ષે વિવિધ તાલીમ કાર્યક્રમો યોજાય છે. આ જ અનુસંધાને પંડિત દીનદયાળ ઉપાધ્યાય પર્વતારોહણ તાલીમ કેન્દ્ર, જૂનાગઢ સંચાલિત એડવેન્ચર કોર્સનું આયોજન આ વર્ષે તા.૨૫ ઓક્ટોબર થી ૩૧ ઓક્ટોબર દરમિયાન કરવામાં આવ્યું છે.
આ તાલીમ ખાસ કરીને ૮ થી ૧૩ વર્ષની વયના વિદ્યાર્થીઓ માટે રહેશે. સમગ્ર તાલીમ કાર્યક્રમ સરકારના સંપૂર્ણ ખર્ચે યોજાશે, એટલે કે ભાગ લેનાર વિદ્યાર્થીઓને કોઈપણ પ્રકારની ફી ભરવાની નહીં પડે.
આ એડવેન્ચર કોર્સમાં બાળકોને પર્વતારોહણના પ્રાથમિક તબક્કા સાથે વિવિધ સાહસિક પ્રવૃત્તિઓ – જેમ કે ટ્રેકિંગ, રોક ક્લાઈંબિંગ, રેપેલિંગ, ઝીપ લાઈન, ટીમ બિલ્ડિંગ એક્ટિવિટીઝ તથા કુદરતી પરિસ્થિતિમાં સર્વાઈવલ સ્કિલ્સ શિખવવામાં આવશે. તાલીમાર્થીઓમાં આત્મવિશ્વાસ, નેતૃત્વ ક્ષમતા અને શિસ્તનો વિકાસ કરાવવાનો મુખ્ય હેતુ રાખવામાં આવ્યો છે.
કોર્સ માટે અરજી કરવા ઈચ્છુકોએ નિયત ફોર્મ SVIM ADMINISTRATION ના અધિકૃત ફેસબુક પેજ પરથી ડાઉનલોડ કરવાનું રહેશે. અરજી સાથે જરૂરી દસ્તાવેજો – જેમ કે જન્મતારીખનો પુરાવો, આધાર કાર્ડની નકલ અને માતા-પિતાની સંમતિપત્ર – જોડવા ફરજિયાત છે.
ફોર્મ તા.૨૬ સપ્ટેમ્બર ૨૦૨૫ સુધીમાં પંડિત દીનદયાળ ઉપાધ્યાય પર્વતારોહણ તાલીમ કેન્દ્ર, લાખાકોઠા, ભવનાથ, જૂનાગઢ-૩૬૨૦૦૨ ખાતે રૂબરૂ કે પોસ્ટ મારફતે જમા કરાવવાનું રહેશે. નિયત સમય બાદ આવનાર અરજીઓ પર કોઈ વિચારણા કરવામાં આવશે નહીં.
વધુ માહિતી અને માર્ગદર્શન માટે તાલીમાર્થીઓ કે તેમના વાલીઓએ ઓફિસ નંબર ૦૨૮૫-૨૬૨૭૨૨૮ પર સીધો સંપર્ક કરવા વિનંતી કરવામાં આવી છે.
આ બાબતની વિગત એક અખબારી યાદી દ્વારા ઇન્સ્ટ્રક્ટર ઇન-ચાર્જ, પંડિત દીનદયાળ ઉપાધ્યાય પર્વતારોહણ તાલીમ કેન્દ્ર, જૂનાગઢ દ્વારા જાહેર કરવામાં આવી છે.
અહેવાલ : નરેન્દ્ર દવે સાથે જગદીશ યાદવ, જૂનાગઢ
