ડભોઇ તાલુકાના વિકાસના ઈતિહાસમાં આજે એક મહત્વપૂર્ણ પર્વે ઉમેરો થયો, જ્યાં તાલુકાના છ જેટલા ગામોમાં નવીન આંગણવાડીઓના ભૂમિપૂજન અને ગામના સ્વચ્છતાના હેતુસર ઈ-ઓટોરિક્ષાનું લોકાર્પણ ધારાસભ્ય શ્રી શૈલેષભાઈ મહેતાના હસ્તે ભવ્ય રીતે યોજાયું.
આ કાર્યક્રમ ડભોઇ તાલુકાના ઢોલાર, સીમળીયા, નવી માંગરોળ, કરનાળી, શંકરપુરા અને બનૈયા ગામો માટે ખાસ મહત્વનો રહ્યો. આ તમામ ગામોમાં છેલ્લા ઘણા વર્ષોથી જર્જરિત હાલતમાં ચાલતી આંગણવાડીઓમાં નાનાં ભૂલકાઓ શિક્ષણ મેળવતા હતા. ગ્રામજનો તરફથી ધારાસભ્યશ્રી સમક્ષ રજૂઆતો કરાયા બાદ તેમણે તાત્કાલિક સ્ટેમ્પ ડ્યુટી હેઠળ ગ્રાન્ટ મંજૂર કરાવી અને નવા નાંગલા બાળકો માટે સુસજ્જ અને સુરક્ષિત અભ્યાસ સ્થળ ઉભું કરવા માટે આ નવા બિલ્ડિંગના કાર્યની શરૂઆત કરવામાં આવી.
આ સાથે સાથે, ગામોમાં સ્વચ્છતા જળવાઈ રહે, કચરો સુવ્યવસ્થિત રીતે ઉપાડવામાં આવે અને સુકો તથા લીલો કચરો અલગ રીતે સંભાળવામાં આવે એ હેતુથી ઈ-ઓટોરિક્ષા પણ ગામોને અર્પણ કરવામાં આવી. ગ્રામ્ય સ્વચ્છતા અભિયાનને વેગ આપતી આ ઈ-ઓટોરિક્ષાઓ સંપૂર્ણપણે ઈકો-ફ્રેન્ડલી છે અને નવો ટેકનોલોજી આધારિત વિકાસનુ દ્રષ્ટાંત પૂરું પાડે છે.
આ ભવ્ય પ્રસંગે વડોદરા જિલ્લા પંચાયતના ઉપપ્રમુખ અશ્વિનભાઈ પટેલ, તાલુકા યુવા મોરચાના પ્રમુખ નિરવભાઈ પટેલ, કાયાવરણના સરપંચ હિતેશભાઈ પટેલ અને ઢોલારના સરપંચ સપનાબેન પાર્થભાઈ પટેલ હાજર રહ્યા હતા. ગામના ધાર્મિક આગેવાનો, સન્માનીત મહેમાનો અને ગ્રામજનો મોટી સંખ્યામાં ઉપસ્થિત રહી સરાહના વ્યકત કરી હતી.
ધારાસભ્યશ્રી શૈલેષભાઈ મહેતાએ પોતાના સંબોધનમાં જણાવ્યું હતું કે, “આંગણવાડી બાળકોના ભવિષ્યની નાની ચાવી છે. અમે તેમને શ્રેષ્ઠ સુવિધાઓ પૂરી પાડી શકીએ તો આવનારી પેઢી મજબૂત બને. સાથે સાથે ગામની સ્વચ્છતા એ વિકાસના પાયાનું મહત્વનું અંગ છે.”
આ સમગ્ર કાર્યક્રમ દ્વારા ડભોઇ તાલુકા વિકાસના એક નવા अध्यાય તરફ આગળ વધ્યું છે. આ પહેલ કેવળ શારીરિક ઢાંચાની સુધારણા નથી, પરંતુ ભવિષ્યની પેઢી માટે એક આશાવાદી યાત્રાનો પ્રારંભ છે.
અહેવાલ: વિવેક જોષી, ડભોઇ
