ગીર સોમનાથ જિલ્લામાં તંત્ર ગ્રામજનોના દ્વાર સુધી પહોંચી તેમના પ્રશ્નોનું સ્થળ પર જ નિરાકરણ લાવવાના હેતુથી સતત પ્રયાસશીલ છે. તાજેતરમાં કલેક્ટર એન.વી. ઉપાધ્યાયની અધ્યક્ષતામાં ગીરગઢડા તાલુકાના નગડિયા ગામે રાત્રિસભાનું આયોજન કરવામાં આવ્યું હતું.
આ રાત્રિસભામાં ગામજનો દ્વારા વિવિધ પ્રશ્નો અને આવશ્યકતાઓ રજૂ કરવામાં આવી જેમકે:
નગડિયા-સણોસરી રોડ અને એપ્રોચ રોડનું નિર્માણ
પૂર સંરક્ષણ દિવાલ
આંગણવાડી તેમજ સ્મશાન માટે માળખાગત સુવિધાઓ
ચેકડેમ, કોમ્યુનિટી હોલ, APMC
પી.જી.વી.સી.એલની સમસ્યાઓ
આરોગ્યલક્ષી સુવિધાઓ
વારસાઈના દસ્તાવેજો સંબંધિત પ્રશ્નો
કલેક્ટરે તમામ પ્રશ્નો સહાનુભૂતિપૂર્વક સાંભળી અને સંબંધિત અધિકારીઓને સૂત્રબદ્ધ અને ઝડપી નિરાકરણ માટે જરૂરી સૂચનાઓ આપી. તેમણે જણાવ્યું કે ગામના સમરસતાના માળખાને ધ્યાનમાં રાખી વિકાસના કાર્યોમાં તંત્ર સંપૂર્ણ સમર્પિત છે.
કલેક્ટરે નગડિયા ગામે વર્ષોથી મહિલા સમરસ પંચાયત અને ગુનામુક્ત માહોલ હોવાને વખાણતાં એવું પણ ઉમેર્યું કે આ ગામ સમરસતા અને સૌહાર્દનું પ્રતીક છે.
આ બેઠકમાં નાયબ વન સંરક્ષક વિકાસ યાદવે જંગલ વિસ્તાર અને ખેડૂતોના પ્રશ્નો અંગે હકારાત્મક અભિગમ દાખવી વચન આપ્યું હતું.
ધારાસભ્ય કાળુભાઈ રાઠોડે ગામના ઉત્કૃષ્ટ સંચાલન અને કલેક્ટરના કાર્યપ્રત્યે વિશ્વાસ વ્યક્ત કર્યો હતો.
કાર્યક્રમમાં જિલ્લા વિકાસ અધિકારી સ્નેહલ ભાપકર, પ્રાંત અધિકારી કે.આર. પરમાર, ડી.વાય.એસ.પી ચૌધરી, સહિત વિવિધ વિભાગોના અધિકારીઓ અને ગ્રામજનો મોટી સંખ્યામાં ઉપસ્થિત રહ્યા હતા.
📍 અહેવાલ: પ્રકાશ કારાણી – વેરાવળ, સોમનાથ
