જૂનાગઢ, તા. ૫ – નારી વંદન ઉત્સવ અંતર્ગત ‘મહિલા નેતૃત્વ દિવસ’ની ઉજવણી જિલ્લા પંચાયત સભાખંડ ખાતે જિલ્લા પંચાયત પ્રમુખ હરેશભાઈ ઠુંમરની અધ્યક્ષતામાં કરવામાં આવી હતી. કાર્યક્રમમાં નાયબ જિલ્લા વિકાસ અધિકારી એમ.જે. સોમપુરા, જિલ્લા મહિલા અને બાળ અધિકારી સી.જી. સોજીત્રા, પ્રોગ્રામ ઓફિસર વત્સલાબેન દવે અને દહેજ પ્રતિબંધક સહરક્ષણ અધિકારી બી.ડી. ભાડ ઉપસ્થિત રહ્યા હતા.
મહિલાઓને પ્રોત્સાહનનો સંદેશ
આ પ્રસંગે પ્રમુખ હરેશભાઈ ઠુંમરે મહિલાઓ દરેક ક્ષેત્રમાં આગળ વધે, સ્વનિર્ભર બને તેમજ નેતૃત્વ કરીને દેશના વિકાસમાં ભાગીદાર બને તે માટે આહવાન કર્યું. જિલ્લા વિકાસ અધિકારી મીરાબેન સોમપુરાએ મહિલાઓના નેતૃત્વના ગુણોને ઉજાગર કરતાં દ્રષ્ટાંત સાથે પ્રોત્સાહિત કર્યું અને જણાવ્યું કે મહિલાઓ જાતે જ મનોમંથન કરીને આગળ વધે.
સન્માન અને સાફલ્યગાથાઓ
કાર્યક્રમ દરમિયાન ગૌશાળા, ગાય આધારિત વ્યવસાય, ખેતી, શિક્ષણ, સંગીત જેવા ક્ષેત્રોમાં આગવું નેતૃત્વ ધરાવતી મહિલાઓ અને કિશોરીઓનું સન્માન કરવામાં આવ્યું. સાથે સાથે તેમની સાફલ્યગાથાઓ રજૂ કરીને અન્ય મહિલાઓ માટે પ્રેરણારૂપ ઉદાહરણ ઉભું કરાયું.
