સમાચાર વિગત: આગ્રા: પ્રેમમાં છેતરપિંડી અને ત્રાસને કારણે એક યુવકે જીવન ટૂંકાવવાનો હૃદયવિદ્રારક નિર્ણય લીધો છે. 26 વર્ષીય જીતેન્દ્ર સિંહે 16મી ફેબ્રુઆરીના રોજ પોતાના ઘરમાં ફાંસી લગાવી જીવન ટૂંકાવી લીધું. પરિવારજનોએ શંકા વિના અંતિમ સંસ્કાર કરી દીધા, પરંતુ 18મી ફેબ્રુઆરીએ એક ચોંકાવનારી માહિતી સામે આવી. સોશિયલ મીડિયા પર યુવકનો વિડિયો અને સુસાઈડ નોટ વાયરલ થઈ હતી, જેમાં તેણે પોતાની ગર્લફ્રેન્ડ અને તેના પરિવારમાંથી કેટલાક લોકોને આપઘાત માટે જવાબદાર ઠેરવ્યા હતા.
વિડિયોમાં યુવકે શું કહ્યું? વિડિયોમાં જીતેન્દ્ર કહે છે કે, ‘હું છેલ્લા આઠ વર્ષથી નીરુ સાથે પ્રેમસંબંધમાં હતો. તેણે મારો વિશ્વાસ જીતી લીધો અને લગ્ન માટે દબાણ કર્યું. પરંતુ તેના પરિવારજનોએ લગ્ન માટે 10 લાખ રૂપિયા માગ્યા. મેં સંઘર્ષ કરીને 7 લાખ રૂપિયા આપ્યા. ત્યાર બાદ નીરુએ લગ્ન કરવાને નકારી કાઢ્યું. જ્યારે મેં પૈસા પાછા માંગ્યા, ત્યારે તેણે અને તેના ભાઈઓએ ધમકી આપવાનું શરૂ કર્યું.’
પોલીસ તપાસ શરૂ જીતેન્દ્રના પિતા રાજેન્દ્ર સિંહે પોલીસમાં ફરિયાદ નોંધાવી છે. એતમાદપુર વિસ્તારની રહેવાસી નીરુ, તેના ભાઈઓ મનોજ, સૌરભ અને માતા-પિતાને આ કેસમાં આરોપી બનાવવામાં આવ્યા છે. પોલીસે આત્મહત્યા માટે ઉશ્કેરણી સહિતની કલમો હેઠળ કેસ દાખલ કરી વધુ તપાસ શરૂ કરી છે.
આ દુઃખદ ઘટનાએ માનસિક આરોગ્ય અને પ્રેમમાં છેતરપિંડી જેવા મુદ્દાઓને લઈને ચર્ચા જગાવી છે. લોકો માટે સુખ-દુઃખની ઘડીઓમાં મદદરૂપ થવા અને જાગૃતિ લાવવાની જરૂર છે.
