ભાયાવદર (જામકંડોરણા):
ભાયાવદરમાં ગત સોમવારે પાનની દુકાને બેઠેલા કોંગ્રેસ આગેવાન નયન જીવાણી પર ભાજપના તાલુકા પ્રભારી ઇંદ્રવિજયસિંહ ચુડાસમા અને મળતીયા દ્વારા હુમલો કરવામાં આવ્યો હોવાનો ગંભીર આક્ષેપ કોંગ્રેસ દ્વારા કરવામાં આવ્યો છે.
આ ઘટનાના સીસીટીવી ફૂટેજ સામે આવ્યા બાદ કોંગ્રેસ અને ભાજપ બંને તરફથી સામસામી ફરિયાદો નોંધાઈ છે. કોંગ્રેસ દ્વારા નોંધાવવામાં આવેલી ફરિયાદના આધારે ત્રણ ભાજપ કાર્યકરો વિરુદ્ધ પોલીસમાં નોંધ થઈ છે જેમાં તાત્કાલિક પગલાં તરીકે તપાસ શરૂ કરવામાં આવી છે.
ઘટનાના પગલે ભાજપના મહામંત્રીએ પણ નયન જીવાણી પર ઉલટ આક્ષેપ કરતા કહ્યુ કે, ભાજપ કાર્યકરો પર પણ હુમલો થયો હતો. કોંગ્રેસ દ્વારા 14મી તારીખે અડધા દિવસના બંધનું એલાન અપાયું હતું, જેને મિશ્ર પ્રતિસાદ મળ્યો હતો – મોટા ભાગના વેપારીઓએ દુકાનો ખુલ્લી રાખી કોંગ્રેસના બંધને અસફળ બનાવ્યો હતો.
બીજી તરફ, આ મામલે રાજકીય ગરમાવો વધતા નગરપાલિકા પ્રમુખ રેખાબેન સિણોજીયા સહિત ભાજપ આગેવાનો ભાયાવદર પોલીસ સ્ટેશન પહોંચી પીઆઈને આવેદનપત્ર આપ્યું હતું. તેમણે જણાવ્યું કે, કોંગ્રેસ હાર માન્યા બાદ ખોટા આક્ષેપો કરીને તણાવનો માહોલ ઉભો કરે છે.
જામકંડોરણા તાલુકાના ભાજપ પ્રભારી ઇંદ્રવિજયસિંહ ચુડાસમાએ પ્રતિક્રિયા આપતા જણાવ્યું હતું કે, “હું ત્યાં માત્ર હુમલાની જાણ મળ્યા બાદ પહોંચ્યો હતો. જો મારા પરCongress આગેવાને કોઈ સ્પષ્ટ પુરાવા આપે કે મેં હુમલો કર્યો છે, તો હું સજા ભોગવવા તૈયાર છું.”
તેમણે વધુમાં એવો દાવો કર્યો કે, “કોંગ્રેસના આગેવાન ભૂતકાળમાં પણ નસાની હાલતમાં ઝગડાં કરતા હોવાના કેસમાં ઓળખાય છે. હાલમાં તેઓ પાટીદાર ક્ષત્રિય વિવાદ ઉભો કરીને રાજકીય રોટલા શેકી રહ્યાં છે.”
હાલમાં ભાયાવદર પોલીસ સમગ્ર મામલે સીસીટીવી ફૂટેજ અને બંને પક્ષોના નિવેદનોના આધારે તપાસ ચલાવી રહી છે.
ઘટનાનું સાચું કારણ અને જવાબદારી કોની છે તે પોલીસે આગળની તપાસ બાદ જાહેર કરશે.
