ભાવનગર શહેરના કુંભારવાડા વિસ્તારમાં જાહેરમાં ગંજીપત્તાના પાનાં વડે હાથકાંપનો જુગાર રમતાં ત્રણ શખ્સોની ધરપકડ કરવામાં આવી છે. લોકલ ક્રાઇમ બ્રાન્ચ દ્વારા હાથ ધરાયેલ આ કાર્યવાહી દરમિયાન ૨૧,૦૫૦ રૂપિયાનું રોકડ રકમ સહિત જુગારના પાનાં અને અન્ય મુદ્દામાલ કબ્જે કરવામાં આવ્યો છે.
પોલીસ મહાનિરીક્ષક ગૌતમ પરમાર તથા પોલીસ અધીક્ષક ડૉ. હર્ષદ પટેલની સૂચનાથી ભાવનગર લોકલ ક્રાઇમ બ્રાન્ચના પોલીસ ઇન્સ્પેક્ટર એ.આર. વાળા તથા તેમની ટીમ દારૂ તથા જુગાર જેવી પ્રવૃતિઓને નિયંત્રણમાં લેવા માટે સતત કામગીરી કરી રહી છે. આ પગલાં હેઠળ ૨૯ જુલાઈના રોજ એલ.સી.બી.ની ટીમ ભાવનગર શહેરના નારી રોડ, પીપરવાલા ચોક પાસે પેટ્રોલિંગમાં હતી ત્યારે બાતમી મળી કે ખાતરવાડી વિસ્તારમાં જાગુભાઇ ધીરૂભાઇ પરમારના ઘર સામે જાહેરમાં કેટલાક શખ્સો જુગાર રમે છે.
પોલીસે તાત્કાલિક રેઇડ કરતાં ત્રણ શખ્સો રંગેહાથ પકડાઈ ગયા. તેમને અટક કરી પોલીસે ગાંધીપત્તાના પાનાં, રોકડ રકમ અને ગોદડું મળી કુલ રૂપિયા ૨૧,૦૫૦નો મુદ્દામાલ કબ્જે કર્યો છે. પકડાયેલ આરોપીઓમાં રવજીભાઇ ઉર્ફે ગોકો ઘાંઘુ, સુનિલ ચુડાસમા અને રોહિત પરમારનો સમાવેશ થાય છે.
આ સમગ્ર કામગીરીમાં એલ.સી.બી.ના અધિકારીઓ અનિરૂદ્ધસિંહ ગોહિલ, બાવકુદાન કુંચાલા, માનદિપસિંહ ગોહિલ, એજાજખાન પઠાણ અને જયદિપસિંહ ગોહિલની ટીમે ભાગ લીધો હતો. આરોપીઓ વિરુદ્ધ બોરતળાવ પોલીસ સ્ટેશનમાં જુગાર પ્રતિબંધક અધિનિયમ હેઠળ ગુનો નોંધવામાં આવ્યો છે.
અહેવાલ : સતાર મેતર, ભાવનગર
