કચ્છની રણમાટીમાંથી હરિયાળું ક્રાંતિકારક ચમત્કાર સર્જાતો આવ્યો છે. વિશ્વનું સૌથી વિશાળ મિયાવાકી જંગલ હવે કચ્છના ભુજમાં ભુજીયા ડુંગરની ગોદમાં વ્યાપી ચૂક્યું છે. ૧૧૭ પ્રકારના ૪ લાખથી વધુ વૃક્ષો ધરાવતું આ જંગલ હવે માત્ર હરિયાળીનું નહીં, પરંતુ માનસિક શાંતિ અને આરોગ્ય માટેનું એક આંતરરાષ્ટ્રીય ‘ફોરેસ્ટ બાથ’ હબ બની ગયું છે.
જાપાનમાં ૧૯૮૦થી લોકપ્રિય બનેલી ફોરેસ્ટ બાથ થેરાપી (Shinrin-Yoku) હવે કચ્છમાં પણ અનુભવવી શક્ય બની છે. આ જંગલમાં ઊંડા શ્વાસ લેતા લેતા વૃક્ષો વચ્ચે શાંતિથી ચાલવાનું મન અને શરીરને નવી ઊર્જા આપે છે.
મિયાવાકી પદ્ધતિથી તૈયાર થયેલું આ વન વડાપ્રધાન નરેન્દ્ર મોદીજીના વિકાસના વિઝન અંતર્ગત ઉભું થયું છે. ભૂતપૂર્વ ભૂકંપપીડિત વિસ્તારોમાં હવે ઘન જંગલનું રૂપ લેનાર આ વન ‘સ્મૃતિવન’ ના શાંતીમય વાતાવરણ સાથે સમાનાંતર બનેલું છે. ૨૦૨૧થી ૨૦૨૩ દરમ્યાન પ્રથમ ફેઝમાં સરકાર અને ખાનગી સહકારથી અહીં ૫ લાખથી વધુ વૃક્ષો રોપાયા છે અને આગળના બે ફેઝમાં કુલ ૪૦ લાખ વૃક્ષો થકી જંગલ વિસ્તૃત બનવાનું છે.
વિશેષ વાત એ છે કે અહીં ફળદ્રુપ, ઔષધીય, સુંદર અને રક્ષણાત્મક વૃક્ષોનો સમાવેશ થાય છે – જેમ કે પિપળો, રૂદ્રાક્ષ, બામ્બુ, જામુંન, પલાશ, નાગચંપા, સરગવો, મેંગો, મહોંગની, અમળા, સેતુર અને અનેક ઔષધીય વૃક્ષો.
આ વનમાં તૈયાર કરાયેલો ૮ કિમીનો નેચરલ વોકવે હવે મોર્નિંગ અને ઇવનીંગ વોક માટે લોકપ્રિય બન્યો છે. અહીંના ૫૦ ચેકડેમ વરસાદનું પાણી સંગ્રહે છે, જેમાં કુદરતી માછલી અને કાચબા પણ જોવા મળે છે – જે પ્રકૃતિના સંપૂર્ણ ઈકો સિસ્ટમને જીવંત બનાવે છે.
ડૉ. આર.કે. નૈયર જણાવે છે કે, આ વનના કારણે આસપાસના તાપમાનમાં ૬ થી ૭ ડીગ્રી ઘટાડો જોવા મળ્યો છે. ડોકટરો માસમાં એકવાર ફોરેસ્ટ બાથ લેવા સલાહ આપે છે. કચ્છના વાસીઓને હવે માટે આ જીવનશૈલીનો ભાગ બની રહ્યો છે.
આ વન હવે ગ્લોબલ વેલનેસ ટુરિઝમ માટે નવી દિશા નિર્ધારિત કરી રહ્યું છે. પ્રકૃતિપ્રેમી, યોગ સાધક, પ્રવાસીઓ અને વિદ્યાર્થીઓ માટે આ સ્થળ એક જીવંત પરીક્ષણશાળા સમાન બની ગયું છે.
📌 ટૂંકમાં:
- વિશ્વનું સૌથી મોટું મિયાવાકી વન
- ૧૧૭ પ્રકારના ૪ લાખથી વધુ વૃક્ષો
- ૮ કિમી લાંબો નેચરલ વોકવે
- તાપમાનમાં ઘટાડો, તણાવ મુક્તિ અને સ્વાસ્થ્ય લાભ
- કચ્છનું ગૌરવપૂર્ણ વૈશ્વિક આકર્ષણ
અહેવાલ :- નિલેશ ભટ્ટ, ભુજ
