રાજકોટ: રાજકોટની ખાનગી મેટરનિટી હોમમાં મહિલા દર્દીઓની સારવાર દરમિયાન રેકોર્ડ થયેલા CCTV ફૂટેજ યૂટ્યુબ અને ટેલીગ્રામ ચેનલ પર અપલોડ થતા મામલો વિધાનસભા સુધી પહોંચી ગયો છે. વિપક્ષ દ્વારા આ મુદ્દે 166 હેઠળની તાકીદીની જાહેર અગત્યની બાબત તરીકે ચર્ચા ઉઠાવવામાં આવી હતી. કોંગ્રેસના વિધાનસભા પક્ષના નેતા અમિત ચાવડા, ધારાસભ્યો શૈલેષ પરમાર, કિરીટ પટેલ અને તુષાર ચૌધરી દ્વારા આપવામાં આવેલી નોટીસ અંગે રાજ્યના ગૃહ રાજ્ય મંત્રી હર્ષ સંઘવીએ નિવેદન આપ્યું હતું.
દર્દીઓની પ્રાઈવસી ભંગ થવા પર ઉઠ્યા સવાલો
વિપક્ષ દ્વારા ખાનગી હોસ્પિટલોમાં દર્દીઓની ગોપનીયતા (પ્રાઈવસી) ભંગ થવા અંગે ગંભીર સવાલો ઉઠાવાયા હતા. જાહેર જનતામાં પણ આ ઘટનાને લઈને ભારે રોષ જોવા મળી રહ્યો છે. ગૃહ રાજ્ય મંત્રીએ નિવેદનમાં જણાવ્યું કે, “આ મામલે અમદાવાદ શહેરની સોશિયલ મીડિયા મોનિટરિંગ સેલની ટીમે 17 ફેબ્રુઆરી, 2025ના રોજ યૂટ્યુબ પર અપલોડ થયેલા હોસ્પિટલના ચેક-અપ રૂમના વીડિયો વિશે જાણ કરી હતી.” ત્યારબાદ અમદાવાદ સાઈબર ક્રાઇમ પોલીસે IT એક્ટની કલમ-66(ઇ) અને 67 હેઠળ ગુનો દાખલ કર્યો છે.
CCTV ફૂટેજ બહાર કયાથી આવ્યા?
આ મુદ્દાની ઊંડાણપૂર્વક તપાસ દરમિયાન માલૂમ પડ્યું કે આ CCTV ફૂટેજ રાજકોટની પાયલ મેટર્નિટી હોમના છે. તેમજ યૂટ્યુબ અને ટેલીગ્રામ ચેનલના ક્રિએટરો ગુજરાત રાજ્યની બહારના હોવાની માહિતી મળી છે.
મહારાષ્ટ્ર અને ઉત્તર પ્રદેશમાં તપાસ માટે રવાના ટીમો
તપાસમાં જાણવા મળ્યું કે બે અલગ-અલગ ટીમો મહારાષ્ટ્રના લાતુર જિલ્લાના સાંગલી અને ઉત્તર પ્રદેશના પ્રયાગરાજ જિલ્લાના ભીંસ ખાતે તપાસ માટે રવાના કરાઈ.
36 કલાકમાં 3 સંદિગ્ધ ઇસમોની ધરપકડ
પોલીસની ટીમે 1300 કિ.મી.નું અંતર કાપીને માત્ર 36 કલાકમાં 3 શંકાસ્પદ ઇસમોને પકડી પાડ્યા છે. જેમાં મહારાષ્ટ્રમાંથી બે અને ઉત્તર પ્રદેશમાંથી એક શખ્સની ધરપકડ કરવામાં આવી છે.
હેકર્સ કેવી રીતે વીક CCTV પાસવર્ડનો ઉપયોગ કરતા હતા?
પ્રાથમિક પૂછપરછમાં જાણવા મળ્યું કે આ આરોપીઓ હેકર્સ છે, જે અલગ-અલગ રાજ્યોની હૉસ્પિટલો અને જાહેર જગ્યાના CCTV કેમેરાઓ, જેઓના સુરક્ષા પાસવર્ડ બહુ કમજોર (Weak) અથવા ડિફોલ્ટ હોય, તે હેક કરીને યૂઝર ID અને પાસવર્ડ વેચતા હતા. આ તમામ કાર્યવાહી આર્થિક લાભ મેળવવા માટે કરવામાં આવતી હતી.
તપાસ હજુ ચાલુ: IT Actની વધુ એક કલમ ઉમેરાઈ
હાલમાં આ કેસની વધુ તપાસ અમદાવાદ શહેરની સાઇબર ક્રાઇમ પોલીસ કરી રહી છે. તપાસ દરમિયાન IT Actની કલમ 66F(2) નો પણ ઉમેરો કરવામાં આવ્યો છે.
આ મામલો દર્દીઓની સુરક્ષા અને ખાનગી હોસ્પિટલોમાં CCTV ઉપયોગ વિશે ગંભીર પ્રશ્નો ઊભા કરે છે. હવે જોવું રહ્યું કે સરકાર આ મુદ્દે કેવા પગલા ભરે છે!
અહેવાલ :- ગુજરાત બ્યુરો
