વડોદરા: શહેરમાં ટ્રાફિક સમસ્યાને ઓછા કરવા માટે કરોડો રૂપિયાના ખર્ચે ઓવરબ્રિજ બનાવવામાં આવ્યા છે, પરંતુ તેમ છતાં બ્રિજ નીચે ટ્રાફિક સિગ્નલો મૂકવામાં આવવાના કારણે ટ્રાફિક જામની સમસ્યા ઊભી થઈ છે. આ મુદ્દે વડોદરા મ્યુનિસિપલ કોર્પોરેશનની બેઠકમાં સર્વે હાથ ધરવાની માંગ ઉઠી છે.
ઓવરબ્રિજ અને ટ્રાફિક સમસ્યા
બજેટ બેઠકમાં ભાજપના વોર્ડ નં. 10ના કોર્પોરેટરે આ મુદ્દો ઉઠાવતા જણાવ્યું કે હરીનગર, ચકલી સર્કલ અને યોગ સર્કલ જેવા ઓવરબ્રિજ નીચે ભારે ટ્રાફિક જોવા મળે છે. તેમણે પ્રશ્ન ઉઠાવ્યો કે જયારે બ્રિજ બનાવવામાં આવ્યા છે, ત્યારે નીચે સિગ્નલોની જરૂર શું? તેમણે આ માટે પોલીસ કમિશનર સાથે બેઠક યોજી સર્વે કરવાનું સુચન કર્યું.
ટ્રાફિક સિગ્નલો અને સમયગાળાની વિસંગતતા
શહેરના વિવિધ સ્થળોએ સિગ્નલ સમયગાળા અનિયમિત છે. ગ્રીન લાઈટ ક્યાંક 20 સેકન્ડ ચાલે છે, તો ક્યાંક 130 સેકન્ડ સુધી રહે છે. કોંગ્રેસના વોર્ડ એકના કોર્પોરેટરે પણ આ બાબતે અવાજ ઉઠાવ્યો કે કેટલીક જગ્યાએ જ્યાં ટ્રાફિક જામની શક્યતા ઓછી છે, ત્યાં પણ સિગ્નલ મૂકી દેવાયા છે, જેના કારણે ટ્રાફિકની સમસ્યા ઊભી થાય છે.
મહિલા કોર્પોરેટરની રજૂઆત
એક મહિલા કોર્પોરેટરે જણાવ્યું કે યોગા સર્કલ નજીક 180 સેકન્ડનું વેઇટિંગ સમયગાળો હોવા છતાં ટ્રાફિક સમસ્યા યથાવત છે. આ ઉપરાંત, અટલ બ્રિજના લેન્ડિંગ પર પણ સતત ટ્રાફિક જામની પરિસ્થિતિ સર્જાય છે.
સમસ્યા અને ઉકેલ માટે અભ્યાસની જરૂર
શહેરમાં ટ્રાફિક સિગ્નલોની અવશ્યકતા અને સમયગાળાનો પુનર્વીચાર કરવા માટે એક વ્યાપક સર્વે હાથ ધરવા માગણી કરવામાં આવી છે. આ મુદ્દે મ્યુનિસિપલ કોર્પોરેશનના અધ્યક્ષે પોલીસ કમિશનર સાથે બેઠક રાખી યોગ્ય પગલાં ભરવાની નિર્દેશ આપ્યો છે.
અહેવાલ :- ગુજરાત બ્યુરો
