વડોદરા: વડોદરા મ્યુનિસિપલ કોર્પોરેશન સંચાલિત શિક્ષણ સમિતિના શિક્ષકોના પગારમાંથી આડેધડ ઇન્કમટેક્સ કપાત કરવામાં આવતા શિક્ષકોમાં ભારે રોષ જોવા મળ્યો હતો. ખોટી રીતે કપાત કરાયેલી રકમ પરત કરવા માટે આજે શિક્ષક સંઘના આગેવાનો શિક્ષણ સમિતિના અધ્યક્ષ નીશિધ દેસાઈ સમક્ષ રજૂઆત કરવા પહોંચ્યા હતા.
અચાનક ઇન્કમટેક્સ કપાતથી શિક્ષકો મુશ્કેલીમાં
ગત ત્રણથી ચાર મહિનાથી શિક્ષકોના પગારમાંથી દર મહિને 15,000 થી 20,000 રૂપિયા સુધીનો ઇન્કમટેક્સ આડેધડ કાપી લેવામાં આવી રહ્યો છે. આકસ્મિક કપાતના કારણે અનેક શિક્ષકોને નાણાકીય સંકડામણનો સામનો કરવો પડ્યો છે.
- ઘણા શિક્ષકોના બેંક હપ્તા અટવાયા છે.
- બાળકોની સ્કૂલ ફી ભરવામાં મુશ્કેલીઓ આવી.
- પગારમાંથી માત્ર 5,000 રૂપિયા જ હાથમાં મળતાં શિક્ષકોમાં ભારે રોષ છે.
શિક્ષક સંઘ દ્વારા દેખાવો, અધ્યક્ષ સમક્ષ રજૂઆત
આજ રોજ, વડોદરા શિક્ષણ સમિતિના શિક્ષક સંઘના આગેવાન પિનાકીન પટેલની આગેવાનીમાં, શિક્ષકોએ શિક્ષણ સમિતિની કચેરી બહાર વિરોધ પ્રદર્શન કર્યું.
શિક્ષકોની રજૂઆત બાદ શિક્ષણ સમિતિના અધ્યક્ષ નીશિધ દેસાઈએ ખાતરી આપી કે ખોટી રીતે કપાત કરાયેલ ઇન્કમટેક્સ રકમની તપાસ કરવામાં આવશે અને શિક્ષકોને નાણા પરત કરવામાં આવશે.
શિક્ષકોને ન્યાય મળશે?
શિક્ષકોને નાણાકીય નુકસાન ન થાય અને ભવિષ્યમાં આવી પરિસ્થિતિ સર્જાય નહીં તે માટે શિક્ષણ સમિતિ દ્વારા યોગ્ય પગલાં ભરાશે કે કેમ, તે જોવાનું રહેશે.
અહેવાલ: ગુજરાત બ્યુરો
