જૂનાગઢ તા. ૧૭ :
રાજ્યના કૃષિ અને જૂનાગઢ જિલ્લાના પ્રભારી મંત્રી શ્રી રાઘવજીભાઈ પટેલે આજે વર્ષા વિજ્ઞાન મંડળ અને જૂનાગઢ કૃષિ યુનિવર્સિટીના સંયુક્ત ઉપક્રમે આયોજિત ૩૧મા વર્ષા વિજ્ઞાન પરિસંવાદમાં ઉપસ્થિત રહી પરંપરાગત વરસાદી આગાહીના જ્ઞાનને વૈજ્ઞાનિક પાયા પર માન્યતા અપાવવાના પ્રયાસોને પ્રશંસા યોગ્ય ગણાવ્યા.
મંત્રીએ ઉમેર્યું કે, “આપણી સંસ્કૃતિનો ભાગ બનેલ પરંપરાગત જ્ઞાન ખેડૂતોએ વર્ષોથી અમલમાં મૂકી સફળતા મેળવી છે. હવે તેને સાચવી રાખવું અને નવા યુગ માટે તેને વહેંચવું ખૂબ આવશ્યક છે.”
મંત્રીએ જણાવ્યું કે ગત વર્ષે ૫ આગાહીકારોની ૧૦૦ ટકા આગાહી સાચી પડતા, પરંપરાગત જ્ઞાનના મહત્વની પુષ્ટિ થાય છે અને કૃષિ વિભાગ આ વારસાને જાળવવા હંમેશાં ખેડૂતપક્ષે ઉભો રહેશે.
કુલપતિ ડૉ. વી.પી. ચોવટિયા અને એ.આર. પાઠકે પણ પરિસંવાદમાં યોગદાન આપતા કહ્યું કે, આગાહીકારો પશુપંખીઓની હળચાલ, વનસ્પતિના લક્ષણો, આકાશી ગર્ભ અવલોકન, હવામાન પરિવર્તન અને જ્યોતિષ આધારિત ભૂમિકા પરથી આગાહી કરે છે, જે આજે પણ ઘણા અંશે નિખાલસ રીતે સાચી પડે છે.
પરિસંવાદ દરમિયાન મહાનુભાવો દ્વારા “આગામી ચોમાસા અંગેના પૂર્વાનુમાન અને અવલોકનોના સંપુટ”નું વિમોચન પણ કરવામાં આવ્યું.
વર્ષા વિજ્ઞાન મંડળના કારોબારી સભ્ય જેરામભાઈ ટીંબડીયા, હસમુખ નિમાવત અને ભીમાભાઈ ઓડેદરા સહિતના આગાહીકારોએ પોતાના અનુભવ અને આગાહી રજૂ કરી હતી.
પ્રાધ્યાપક ધીમંત વઘાસીયાે મૌસમવિભાગના તાજા આંકડા અને આગાહીકારોના અંદાજની તુલના પણ રજૂ કરી હતી.
અંતે પ્રમુખ એન.બી. જાદવે શાબ્દિક સ્વાગત અને મંત્રી એચ.સી. છોડવાડિયા દ્વારા આભાર વિધિ કરાઈ હતી.
આ કાર્યક્રમમાં કૃષિ યુનિવર્સિટીના વિવિધ વિભાગોના વડાઓ, અગ્રણીઓ, આગાહીકારો અને સન્માનિત મહાનુભાવો હાજર રહ્યા હતા.
📍 અહેવાલ : નરેન્દ્ર દવે સાથે જગદીશ યાદવ, જૂનાગઢ
