ગુજરાતના ભાવનગર જિલ્લાની શિહોર પોલીસે દારૂના ગેરકાયદે જથ્થાની મોટાપાયે પકડ કરતા વિદેશી દારૂના 480 બોટલ અને હ્યુન્ડાઈ ઓરા કાર મળી કુલ 4,36,400 રૂપિયાનો મુદ્દામાલ કબજે કર્યો છે. આ કાર્યવાહી પોલીસ મહાનિરીક્ષક ગૌતમ પરમાર અને એસ.પી. ડો. હર્ષદ પટેલના સુચનાથી પાલિતાણા ડિવિઝનના નાયબ પોલીસ અધિક્ષક મિહિર બારિયા દ્વારા શ્રાવણ માસને ધ્યાને રાખીને ચાલી રહેલી વિશેષ ડ્રાઇવ અંતર્ગત હાથ ધરાઈ છે.
શિહોરના દાદાની વાવ પાસે ગાયત્રીનગર સોસાયટીમાં એક સફેદ કલરની ઓરા કાર પાર્ક હતી, જેમાં પાછળની સીટ નીચે ખાસ ભંડાર બનાવવામાં આવ્યું હતું. તપાસ દરમિયાન તેમાં ‘ફોર સેલ ઈન ગોવા’ લખેલી જુદી જુદી બ્રાન્ડની વિદેશી દારૂની કુલ 480 બોટલ મળી આવી.
દારૂની બોટલોમાં રોયલ ચેલેન્જ, સ્ટર્લિંગ રિઝર્વ B7, રિઝર્વ 7 અને ઓક્સમિથ ઈન્ટરનેશનલ બ્લેન્ડેડ હ્વિસ્કી જેવી બ્રાન્ડ્સનો સમાવેશ થાય છે. આરોપી હરમીતભાઈ નીતિનભાઈ રાઠોડ, રહેવા જે શિહોરના ગાયત્રીનગર સોસાયટીનો છે, તેની વિરુદ્ધ પ્રોહીબિશન એક્ટ મુજબ ગુન્હો દાખલ કરવામાં આવ્યો છે.
આ કાર્યવાહી શિહોર પોલીસ સ્ટેશનના પો.ઇન્સ. બી.ડી. જાડેજા અને તેમની સર્વેલન્સ ટીમે અંજામ આપી હતી. પકડી પાડેલ દારૂ અને વાહન કાયદેસરની કાર્યવાહી માટે કબજે લેવામાં આવ્યા છે.
અહેવાલ: સતાર મેતર, શિહોર
