પવિત્ર શ્રાવણ મહિનાના પ્રથમ સોમવારે સોમનાથ મહાદેવના દર્શનાર્થે લાખો શ્રદ્ધાળુઓ ઉમટી પડ્યા હતા. સવારથી જ જય ભોળે નાથના નાદ સાથે ભક્તોની લાંબી લાઈનો જમાઈ હતી, જ્યારે તંત્ર અને શ્રી સોમનાથ ટ્રસ્ટે દર્શનનો આનંદ વિક્ષેપરહિત બને એ માટે શ્રેષ્ઠ અને સુવ્યવસ્થિત વ્યવસ્થાઓ ઉભી કરી હતી.
જુનાગઢ જિલ્લા કલેક્ટર એન.વી. ઉપાધ્યાયે માહિતી આપતા જણાવ્યું કે, “શ્રાવણનું પવિત્ર પ્રથમ સોમવાર હોવાથી ભક્તોની સંખ્યા ઘણી વધુ રહી છે. તંત્ર દ્વારા એ માટે પૂર્વ તૈયારી હેઠળ પોલીસ બંદોબસ્ત, આરોગ્ય સેવા, અગ્નિશમન વ્યવસ્થા, ઈમરજન્સી રિસ્પોન્સ ટીમ, તેમજ ટ્રાફિક અને પાર્કિંગની વિશિષ્ટ વ્યવસ્થાઓ ગોઠવવામાં આવી છે.”
દરશનાર્થે આવેલા દિવ્યાંગ ભક્તો તથા વરિષ્ઠ નાગરિકો માટે ઈ-કાર્ટ વ્યવસ્થા અમલમાં મુકાઈ છે. તેમજ પીવાના પાણી, આરામગૃહ, વિશેષ પ્રસાદ કાઉન્ટર અને શ્રદ્ધાળુઓ માટે પગપાળા પદયાત્રા માર્ગમાં શેડ, આરામ માટે બેઠકો જેવી સુવિધાઓ ઊભી કરાઈ છે.
શ્રી સોમનાથ ટ્રસ્ટના સહયોગથી મંદિરમાં પ્રવેશ, દર્શન અને નીકળવા માટે અલગ-અલગ માર્ગો રાખવામાં આવ્યાં છે જેથી ભીડ નિયંત્રણમાં રહે અને શ્રદ્ધાળુઓને સરળતાથી દર્શન મળે.
ઉલ્લેખનીય છે કે, કેટલાક ભક્તો હરદ્વારથી કાવડ યાત્રા કરીને ગંગાજળ લાવ્યા હતા અને ભગવાન શિવને અભિષેક અર્પણ કર્યો હતો. બીજી તરફ સ્થાનિક અને આસપાસના જિલ્લાઓમાંથી આવેલી મહિલાઓ અને વૃદ્ધોની પણ મોટી સંખ્યામાં હાજરી જોવા મળી હતી.
“સંપૂર્ણ શ્રાવણ માસ દરમિયાન શ્રદ્ધાળુઓ નિશ્ચિંત રહીને સોમનાથ મહાદેવના દર્શન કરી શકે એ માટે તંત્ર પ્રતિબદ્ધ છે,” તેમ કલેક્ટર એન.વી. ઉપાધ્યાયે અંતે ઉમેર્યું હતું.
અહેવાલ : પ્રકાશ કારાણી, વેરાવળ-સોમનાથ
