🌾 નાંદોદી ભાગોળના ખેડૂતો માટે રાહતના પગલા: ડભોઇ નગરપાલિકા દ્વારા વરસાદી કાંસની સફાઈ કામગીરી, ખેડૂતોએ વ્યક્ત કર્યો સંતોષ 🌧️

ડભોઇ:

નાંદોદી ભાગોળના ખેડૂતોના ખેતરોમાં પાણી ભરાવાની સતત સમસ્યા સામે ખેડૂતો દ્વારા મુખ્યમંત્રીશ્રી અને વડોદરા કલેક્ટરને રજૂઆત કરવામાં આવી હતી. ખેતીને નુકસાન પહોંચે તે પૂર્વે જ કલેક્ટરશ્રીના આદેશથી તાત્કાલિક પાણી નિકાલ માટે પગલાં ભરાયા હતા. ડભોઇ નગરપાલિકા દ્વારા વરસાદી કાંસોની સાફસફાઈ શરૂ કરવામાં આવી હતી.

ખાસ કરીને તિલકવાળા રોડથી શિનોર ચોકડી અને કરજણ રોડ સુધી કેનાલની બાજુમાં આવેલ મુખ્ય વરસાદી કાંસોની સંપૂર્ણ સફાઈ ડભોઇ નગરપાલિકાના ચીફ ઓફિસર શ્રી જયકિશન તડવીની સીધી દેખરેખમાં કરવામાં આવી હતી.

નાગરિકો અને ખેડૂતોના સૂચનો જાણવા માટે નગરપાલિકા ખાતે વિશેષ મિટિંગનું આયોજન કરવામાં આવ્યું હતું. જેમાં મોટી સંખ્યામાં ખેડૂતો હાજર રહ્યા હતા અને નગરપાલિકા દ્વારા કરવામાં આવેલી કામગીરી અંગે સંતોષ વ્યક્ત કર્યો હતો. મિટિંગમાં નગરપાલિકાના મેનેજર શ્રી મહેશભાઈ પરમાર તથા પ્રિમોન્સૂન કામગીરીના ઇન્ચાર્જ શ્રી રાજેશભાઈ કટારીયા ઉપસ્થિત રહ્યા હતા.

મહત્વની વાત એ રહી કે ખેડૂતો દ્વારા માર્ગ અને મકાન વિભાગે કરેલી રોડ પહોળા કરવાની કામગીરી દરમિયાન નર્મદા કેનાલની નીચે આવેલ વર્ષો જુના સાઈફન તૂટી ગયાની ફરિયાદ પણ મિટિંગમાં ઉઠાવવામાં આવી. આ બાબતે ખેડૂતોે કલેક્ટર અને નર્મદા કેનાલ વિભાગને રજૂઆત કરવાનું નક્કી કર્યું છે. તેમજ કામ ન થતાં આંદોલનની ચીમકી પણ ઉચ્ચારાઈ છે.

🖊️ અહેવાલ : વિવેક જોષી, ડભોઇ