📌 અંબાજી ખાતે રાષ્ટ્રીય મહિલા આર્ચરી સ્પર્ધાઓનો ભવ્ય આયોજાન!

(માહિતી બ્યુરો, પાલનપુર – તારીખ: 05 એપ્રિલ 2025)

અંબાજી જી.એમ.ડી.સી. ગ્રાઉન્ડ ખાતે આગામી ૮થી ૧૧ એપ્રિલ, ૨૦૨૫ દરમિયાન રાષ્ટ્રીય સ્તરની મહિલા આર્ચરી સ્પર્ધાઓનું વિશાળ આયોજન થવા જઈ રહ્યું છે. ૮ એપ્રિલના રોજ મુખ્યમંત્રીશ્રી ભૂપેન્દ્રભાઈ પટેલના હસ્તે આ રાષ્ટ્રીય સ્પર્ધાનું ઉદ્ઘાટન થશે, તેમજ તે જ દિવસે ૨૫ એમ્બ્યુલન્સનું લોકાર્પણ પણ કરવામાં આવશે.

આ સ્પર્ધાઓમાં દેશભરના ૬૦૦થી વધુ મહિલા આર્ચરી ખેલાડીઓ ભાગ લેશે. રમતોનું આયોજન સ્પોર્ટ્સ ઓથોરિટી ઓફ ગુજરાત અને ટુરિઝમ વિભાગના સંયુક્ત ઉપક્રમે કરવામાં આવ્યું છે, જેના કારણે અંબાજી ખાતે રાષ્ટ્રીય કક્ષાના ખેલોત્સવનો માહોલ જોવા મળશે.

સ્પર્ધા પૂર્વે બનાસકાંઠા જિલ્લાના કલેક્ટરશ્રી મિહિર પટેલના અધ્યક્ષસ્થાને મહત્વપૂર્ણ આયોજન બેઠક યોજાઈ હતી. જેમાં જિલ્લા વિકાસ અધિકારીશ્રી એમ.જે. દવે, અધિક કલેક્ટર શ્રી સી.પી. પટેલ, પ્રાંત અધિકારીશ્રીઓ સહિત વિવિધ વિભાગના અધિકારીઓ ઉપસ્થિત રહ્યા હતા. કલેક્ટરશ્રીએ તમામ અધિકારીઓને સ્પર્ધા દરમિયાન રમતવીરો, મહેમાનો અને નાગરિકો માટે તમામ વ્યવસ્થાઓ સુસજ્જ અને વ્યવસ્થિત રાખવા સચોટ સૂચનાઓ આપી.

આ આયોજન માત્ર રમતગમત પૂરતું નથી, પરંતુ મહિલાઓના સશક્તિકરણ અને ગુજરાતના રમોત્સવ સંસ્કૃતિને વધુ મજબૂતી આપતું એક મહત્વપૂર્ણ પગલું સાબિત થશે.

અહેવાલ: ઉમેશ ઠાકોર બનાસકાંઠા