📢 માંગરોળમાં સંજીવની નેચર ફાઉન્ડેશન દ્વારા વિશ્વ ચકલી દિવસની ઉજવણી અંતર્ગત 3000 ચકલીના માળા, ચણદાની અને પાણીના કુંડાનું વિતરણ!

માંગરોળના લીમડાચોક ખાતે સંજીવની નેચર ફાઉન્ડેશન દ્વારા વિશ્વ ચકલી દિવસની ભવ્ય ઉજવણી કરવામાં આવી હતી. સંસ્થા છેલ્લા દસેક વર્ષથી પર્યાવરણ બચાવ અને અબોલ જીવોના રેસ્ક્યુ અને સારવાર માટે સક્રિય રીતે કામ કરી રહી છે. આ કાર્યક્રમમાં સંસ્થાના પ્રમુખ નરેશબાપુ ગોસ્વામી અને નિલુભાઈ રાજપરાની આગેવાનીમાં સુંદર આયોજન કરવામાં આવ્યું હતું.

આ કાર્યક્રમમાં અંદાજિત 3000 જેટલા ચકલીના માળા, ચણદાની અને પાણીના કુંડાનું વિતરણ કરવામાં આવ્યું. માળા અને કુંડાનું વિતરણ પુઠા અને માટીથી બનેલા શ્રેણીબદ્ધ મટિરિયલથી કરવામાં આવ્યું હતું જેથી ચકલી માટે પ્રાકૃતિક માહોલ સુલભ થાય.

આ ભવ્ય વિતરણ કાર્યક્રમમાં માંગરોળના પીઆઇ દેસાઈ સાહેબ, ગદ્રે મરીનની ટીમમાંથી વિજયભાઈ પંચોલી, ચંદ્રેશભાઈ રાઠોડ, પ્રવીણભાઈ રાઠોડ, જે.જે.સી ફૂડના નારણભાઈ ખેતલપાર, જેઠાભાઈ નંદાણિયા, નાથાભાઈ નંદાણિયા, કાનાભાઈ ચાવડા, વિશ્વ હિન્દુ પરિષદના વિનુભાઈ મેસવાણીયા, પ્રકાશભાઈ લાલવાણી, પ્રફુલભાઈ નાંદોલા, પંકજભાઈ રાજપરા સહિત વિવિધ સામાજિક સંસ્થાઓના આગેવાનો અને નારી શક્તિ મંડળના કાર્યકર બહેનો ઉપસ્થિત રહ્યા હતા.

વિશ્વ ચકલી દિવસની ઉજવણી અંતર્ગત આયોજિત આ કાર્યક્રમમાં મોટી સંખ્યામાં લોકો ઉપસ્થિત રહ્યા હતા અને ચકલી બચાવ માટે ફાઉન્ડેશન દ્વારા કરવામાં આવતી પ્રવૃત્તિઓની ભરપૂર પ્રશંસા કરી હતી. લોકોએ ચકલીના માળા, ચણદાની અને પાણીના કુંડાનો લાભ લીધો અને સંજીવની નેચર ફાઉન્ડેશનના સભ્યોનો આભાર વ્યક્ત કર્યો.

આ પ્રસંગે સંસ્થાના પ્રમુખ નરેશબાપુ ગોસ્વામીએ જણાવ્યું કે, “ચકલીનું સંખ્યા દિનપ્રતિદિન ઘટી રહી છે. ચકલીને બચાવવા માટે કુદરતી માળા અને પાણીના કુંડાની વ્યવસ્થા અતિ આવશ્યક છે. આ વિતરણ દ્વારા ચકલીને આરામદાયક માળા અને પાણી ઉપલબ્ધ થશે, જેનાથી તેમની સંખ્યા વૃદ્ધિ પામશે.”

આ કાર્યક્રમમાં સંજીવની નેચર ફાઉન્ડેશનના સભ્યો, મહેમાનો અને સ્થાનિક રહેવાસીઓએ ભગીરથ પ્રયાસો અને સમર્પણથી કાર્યક્રમને સફળ બનાવ્યો હતો. આ પ્રસંગે સંસ્થાના તમામ સભ્યોને સરાહના અને પ્રોત્સાહન મળ્યું હતું.

👉 રિપોર્ટર: પ્રકાશ લાલવાણી, માંગરોળ – જૂનાગઢ