📰 માંગરોળ: માછીમારોની સમસ્યાઓનો કાયમી ઉકેલ લાવવા માછીમારોની મત્યોદ્યોગ કચેરી સમક્ષ રજૂઆત

માંગરોળ અને ચોરવાડ બંદરના અસંખ્ય માછીમારો દ્વારા આજે મત્યોદ્યોગ અધિકારી સમક્ષ લેખિત અને મૌખિક રજૂઆત કરવામાં આવી. વર્ષોથી ચાલુ આવેલા પ્રશ્નોના કાયમી ઉકેલની માંગ સાથે તેઓ મત્યોદ્યોગ કચેરી ખાતે ઉમટી પડ્યા હતા.

માછીમારોનો આક્ષેપ છે કે સામાન્ય કામો માટે પણ મત્યોદ્યોગ કચેરીએ ધક્કા ખાવા પડે છે. સબસીડી, લાયસન્સ રીન્યુઅલ, પેટ્રોલ-કેરોસીન કાર્ડ જેવી જરૂરી કામગીરીમાં મહિનો મહિનો વીતી જાય છે છતાં નિરાકરણ મળતું નથી. અનેકવાર તેમને વચેટીયાઓનો આશરો લેવો પડે છે, જેને લઈ મચ્છીમારોમાં અસંતોષ ફાટી નિકળ્યો છે.

માંગરોળ બંદર પર હાલે 2200થી વધુ બોટો, 600 જેટલી નાની હોડીઓ તેમજ અનેક નાનાંમોટાં ફિશ બજારો છે. છતાં, તંત્ર દ્વારા અપાતી સેવાઓ ખૂબ જ ધીમી ગતિએ ચાલે છે.

માછીમારોની રજૂઆતમાં ખાસ કરીને ડીઝલ/કેરોસીન સબસીડી, સરકારની યોજના, લાયસન્સ રીન્યુઅલ જેવી સેવાઓ સમયસર કરવા તેમજ તમામ કામગીરી વિના વિલંબ થાય તે માટે સિસ્ટમેટિક પ્રક્રિયા અમલમાં મૂકે તેવી માગણી કરવામાં આવી છે.

માછીમારોએ ચેતવણી આપી છે કે જો તાત્કાલિક પગલાં ન લેવાશે તો તેઓ આંદોલનનું માર્ગ અપનાવી શકશે.

અહેવાલ: પ્રકાશ લાલવાણી, માંગરોળ-જુનાગઢ