📰 વિશેષ સમાચાર – કોંગ્રેસએ વિસાવદર અને કડી પેટા ચૂંટણી માટે ચાર ચાર પ્રભારીઓની કરી નિમણૂક

ગાંધીનગર:
વિસાવદર અને કડી વિધાનસભા બેઠકની પેટા ચૂંટણીને લઈને ગુજરાત કોંગ્રેસે પોતાનું મંચ મજબૂત બનાવવાનું શરૂ કરી દીધું છે. ગુજરાત પ્રદેશ કોંગ્રેસ સમિતિના પ્રમુખ અને સાંસદ શ્રી શક્તિસિંહ ગોહિલે જણાવ્યું કે કોંગ્રેસ પક્ષ આ બંને પેટા ચૂંટણીને મજબૂતીથી લડશે અને જીતવા માટે સંપૂર્ણ તૈયારી સાથે મેદાને ઉતરશે.

વિસાવદર બેઠક માટે કોંગ્રેસે ચાર પ્રભારીઓ – પરેશ ધાનાણી, પુજાભાઈ વંશ, ઇન્દ્રનીલ રાજગુરુ અને વશરામ સાગઠીયાની નિમણૂક કરી છે, જ્યારે કડી બેઠક માટે ગેનીબેન ઠાકોર, જીગ્નેશ મેવાણી, કિરીટ પટેલ અને રઘુભાઈ દેસાઈને જવાબદારી સોપવામાં આવી છે.

શક્તિસિંહ ગોહિલએ જણાવ્યું કે, કોંગ્રેસ એ અધિકૃત જાહેરાત પહેલાંથી જ ચૂંટણી માટે સંઘઠન અને કાર્યકર્તાઓ સાથે તૈયારીઓ શરૂ કરી હતી. હવે ચૂંટણી પંચ દ્વારા જાહેરાત બાદ બંને બેઠકના પ્રવાસ અને સંકલન કાર્ય પ્રભારીઓ દ્વારા શરૂ કરવામાં આવશે. ઉમેદવાર પસંદગીને લઈને પણ આગામી દિવસોમાં મોવડી મંડળ સાથે ચર્ચા કરીને લોકસંપર્ક ધરાવતા ઉમેદવારના નામ જાહેર કરવામાં આવશે.

કોંગ્રેસે વધુમાં ભાજપ શાસન હેઠળ થયેલા ભ્રષ્ટાચાર, મોંઘવારી, બેરોજગારી અને ખેડૂતો પરના અન્યાયના મુદ્દાઓને ઉઠાવવાની વચનબદ્ધતા આપી છે. તાજેતરમાં મંત્રી બચુભાઈ ખાબડ સામે થયેલી કાર્યવાહીને ઉદાહરણ તરીકે રજૂ કરતા ગોહિલએ જણાવ્યું કે કોંગ્રેસે ખરેખર જનહિતમાં લડત આપી છે અને આપને આવી લડત માટે જનતાના આશીર્વાદની જરૂર છે.

✍ અહેવાલ:- ગુજરાત બ્યુરો