📰 ૧૬મી સિંહ વસ્તી ગણતરી – ૨૦૨૫નો સાસણગીરથી ભવ્ય શુભારંભ

જૂનાગઢ, તા. ૧૦ મે, ૨૦૨૫ |
મુલુભાઈ બેરાએ ફ્લેગ ઓફ કરીને ગણતરીનો આરંભ કર્યો |

૧૧ જિલ્લામાં ૩૫,૦૦૦ કિમી વિસ્તારમાં થશે સર્વે

ગુજરાત રાજ્યના વન અને પર્યાવરણ તથા પ્રવાસન મંત્રી મુલુભાઈ બેરાએ આજે સાસણગીર ખાતે રાજ્યભરના ૧૬મા સિંહ વસ્તી ગણતરી અંદાજ – ૨૦૨૫નો શુભારંભ કરી ફ્લેગ ઓફ કરાવ્યો.

મંત્રીએ માહિતી આપી કે દર પાંચ વર્ષે એક વખત સિંહોની સંખ્યાના અંદાજ માટે વિશાળ પાયે આ ગણતરીનું આયોજન થાય છે. આ વર્ષે તા. ૧૦ થી ૧૩ મે દરમિયાન બે તબક્કામાં આ અભિયાન હાથ ધરાશે, જેમાં ૧૧ જિલ્લાના ૫૮ તાલુકાઓમાં અંદાજે ૩૫,૦૦૦ કિમી વિસ્તારમાં ડાયરેક્ટ બીટ વેરિફિકેશન પદ્ધતિથી સર્વે કરવામાં આવશે.

૨૦૨૦માં ૬૭૪ સિંહોની વસ્તી નોંધાઈ હતી, જ્યારે આ વખતની ગણતરી માટે વિસ્તૃત આયોજન કરવામાં આવ્યું છે. આખા ક્ષેત્રને રિજન, ઝોન અને સબઝોનમાં વહેંચી, વન વિભાગના અધિકારીઓ, કર્મચારીઓ, એનજીઓ, ૬૦૦થી વધુ સરપંચો અને સક્રિય નાગરિકોને સમાવેશ કરીને કુલ ૩૨૫૪ સ્વયંસેવકોની ટીમ બનાવી છે. સાથે જ નિષ્ણાત નિરીક્ષકોને પણ નિયુક્ત કરાયા છે, જેથી ગણતરીની પારદર્શિતા અને ન્યાયસંગતતા જળવાઈ રહે.

મુલુભાઈ બેરાએ વધુમાં કહ્યું કે, આ વખતે ગણતરીમાં આધુનિક ટેકનોલોજીનો ઉપયોગ થશે જેમાં હાઈ રીઝોલ્યુશન કેમેરા, કેમેરા ટ્રેપ્સ, વગેરેનો સમાવેશ છે. સાસણ ખાતે હાઈટેક મોનિટરિંગ યુનિટ મારફતે ડેટાનું સંકલન અને વિશ્લેષણ કરવામાં આવશે.

ગણતરી પૂર્ણ થયા બાદ તેના આંકડા મુખ્યમંત્રી ભૂપેન્દ્રભાઈ પટેલ દ્વારા જાહેર કરાશે.

પ્રમુખ ઉપસ્થિત અધિકારીઓમાં સચિવ સંજીવ કુમાર, વન વિભાગના જયપાલસિંહ, એ.પી.સિંહ, આર.કે. સુગુર, ડૉ. મોહનરામ (નાયબ વન સંરક્ષક) સહિતના ઉચ્ચ અધિકારીઓએ હાજરી આપી, આયોજનને વેગબક્ષ્યો હતો.

અહેવાલ : નરેન્દ્ર દવે સાથે જગદીશ યાદવ, જૂનાગઢ