📹 ડભોઇ નગરપાલિકા સખત બની:

જાહેરમાં ગંદકી ફેલાવનાર સામે CCTV ફૂટેજના આધારે દંડની કાર્યવાહી

ડભોઇ, તા. ૧૦:
શહેરમાં સફાઈ વ્યવસ્થાને વધુ મજબૂત અને અસરકારક બનાવવા ડભોઇ નગરપાલિકા દ્વારા વિવિધ વિસ્તારોમાં સીસીટીવી કેમેરા લગાવવાની કામગીરી પૂર્ણ કરવામાં આવી છે. હવે જાહેરમાં ગંદકી કે કચરો ફેંકનાર ઇસમો સીધા કેમેરાની આંખમાં કેદ થાય છે અને તેમની સામે દંડસહિત કાયદેસર પગલાં લેવાઈ રહ્યા છે.

સુંદરકુવા અને ગઢ ભવાની મંદિર પાસે દંડની કાર્યવાહી

અત્યારસુધી સીસીટીવી ફૂટેજના આધારે ત્રણ ઇસમો — લીલાબેન મારવાડી, દિવ્યાબેન અલ્પેશભાઈ અને ઉમાબેન કુશવાહા — જાહેરમાં ગંદકી કરતો ચિહ્નિત થયા છે. નગરપાલિકા સેનેટરી શાખાની ટીમ દ્વારા દંડ વસુલાતની કાર્યવાહી હાથ ધરવામાં આવી છે.

ચીફ ઓફિસર સાહેબશ્રીના માર્ગદર્શન હેઠળ કામગીરી

ડભોઇ નગરપાલિકાના ચીફ ઓફિસર સાહેબશ્રીના માર્ગદર્શન હેઠળ ઇન્સ્પેક્ટર મહેશભાઈ વસાવા, સુપરવાઈઝર ઇકબાલભાઈ મન્સૂરી અને ભાવિશાબેન પરમાર સહિતની ટીમે શહેરમાં સફાઈ જાળવી રાખવા માટે સતત પ્રયત્નો ચાલુ રાખ્યા છે.

નગરપાલિકાની સ્પષ્ટ ચેતવણી અને અપીલ

નગરપાલિકા તરફથી જાહેર અપીલ કરવામાં આવી છે કે, હવે ડભોઇ શહેરના હદ વિસ્તારમાં જ્યાં ત્યાં કચરો ન ફેંકો, કેમ કે તમામ વિસ્તારો સીસીટીવીના ઘેરાવમાં છે. આમ કરનારા સામે દંડ તો વસૂલાશે જ, પણ વારંવાર આવું કરનાર સામે કાયદેસર પગલાં પણ લેવામાં આવશે.

શહેરના નાગરિકોને અનુરોધ કરવામાં આવ્યો છે કે, ડોર-ટુ-ડોર કચરા ગાડી કે સફાઈકર્મીને જ કચરો આપો અને શહેરી સ્વચ્છતામાં સહભાગી બનો.

📍 અહેવાલ: વિવેક જોષી – ડભોઇ