🗳️ કરજણ તાલુકાની 41 ગ્રામ પંચાયતોમાં શાંતિપૂર્ણ માહોલ વચ્ચે મતદાનની શરુઆત, મતદારોમાં ઉમંગનો માહોલ

વડોદરા જિલ્લાના કરજણ તાલુકાની 41 ગ્રામ પંચાયતો માટે આજે યોજાયેલી ચૂંટણીમાં મતદાનની શાંતિપૂર્ણ રીતે શરૂઆત થઈ છે. 94 મતદાન મથકો ઉપર વહેલી સવારથીજ મતદારો મતદાન માટે ઉમટી પડ્યા છે.

મતદાન મથકો પર પોલીસ ઇન્સ્પેક્ટર એ.કે. ભરવાડના નેતૃત્વમાં કડક બંદોબસ્ત ગોઠવવામાં આવ્યો છે જેથી કોઈ અનિચ્છનીય બનાવ ન બને અને મતદાન પ્રક્રિયા સુનિયોજિત રીતે પાર પડી શકે.

સ્થાનિક સ્વરાજ્યની ચૂંટણીને લઇને ગામજનોમાં ભારે ઉત્સાહ જોવા મળ્યો છે. સવારથી જ મતદાન મથકો પર લાંબી કતારો જોવા મળી રહી છે જેમાં યુવાનો, વૃદ્ધો અને મહિલાઓ પણ ઉમંગભેર ભાગ લઈ રહ્યા છે.

આજની ચૂંટણીઓ કરજણ તાલુકાના વિકાસ અને પ્રતિનિધિત્વ માટે મહત્વપૂર્ણ બની રહી છે. તંત્ર દ્વારા પણ શાંતિ અને વ્યવસ્થા જળવાઈ રહે એ માટે સંપૂર્ણ તૈયારી કરવામાં આવી છે.

📝 અહેવાલ: મનોજ દરજી, કરજણ