🗳️ કેશોદ તાલુકાની ત્રેવીસ જેટલી ગ્રામ પંચાયતોમાં શાંતિપૂર્ણ માહોલમાં યોજાઈ રહી છે ચૂંટણી, મતદારોમાં ઉત્સાહ

કેશોદ, જૂનાગઢ:
જુનાગઢ જિલ્લાના કેશોદ તાલુકામાં ત્રેવીસ જેટલી ગ્રામ પંચાયતો માટે ગ્રામ પંચાયત ચૂંટણીઓ શાંતિપૂર્ણ માહોલમાં યોજાઈ રહી છે. આ ચૂંટણી લોકશાહીનો પર્વ બની રહી છે જ્યાં ગ્રામજનોએ હળવા વરસાદી માહોલ વચ્ચે પણ ઉત્સાહપૂર્વક મતદાન કર્યું છે.

આમાંથી પાંચ ગ્રામ પંચાયતો સમરસ જાહેર થતાં બાકીની અંદાજિત સત્તર જેટલી પંચાયતોમાં મતદાન પ્રક્રિયા ચાલી રહી છે. ગામડાઓમાં લાંબા સમયથી પ્રતિનિધિ વિહોણી પંચાયતોએ હવે પોતાના લોકપ્રતિનિધિ પસંદ કરવા તક મેળવી છે, જેના કારણે ગ્રામજનોમાં ખુશીની લાગણી જોવા મળી રહી છે.

કેશોદ તાલુકાના જે ગામોમાં મતદાન યોજાઈ રહ્યું છે તેમાં મુખ્યરૂપે ખીરસરા, કેવદ્રા, ખમીદાણા, ડેરવાણ, નુનારડા, નોજણવાવ, ફાગળી, બામણાસા, મધરવાડા, મઢડા, મંગલપુર, માણેકવાડા, રાણીંગપરા, સાંગરશોલા, ભાટ સિમરોલી, બાવા સિમરોલી, સોંદરડા, કાલવાણી, પસવાડીયા, સરોડ જેવા ગામોનો સમાવેશ થાય છે. ઉપરાંત અન્ય ચાર જેટલાં ગામોમાં પેટા ચૂંટણી પણ યોજાઈ રહી છે.

કેશોદ તાલુકા સહિત જૂનાગઢ જિલ્લામાં કુલ અંદાજે ૧૧૦ ગ્રામ પંચાયતોમાં ચૂંટણી યોજાઈ રહી છે. મતદાન પ્રક્રિયામાં શાંતિ જળવાઈ રહે તે માટે તંત્ર તરફથી સુરક્ષા અને વ્યવસ્થાપન માટે સઘન બંદોબસ્ત કરાયો છે.

ગ્રામ્ય વિસ્તારોમાં મતદારો ધીમી ગતિએ પણ નિયમિતપણે મતદાન મથકો પર પહોંચી પોતાના મતાધિકારનો ઉપયોગ કરી રહ્યા છે. લોકશાહી પ્રત્યેનો વિશ્વાસ અને જનભાવનાઓ આ ચૂંટણીમાં સ્પષ્ટપણે દેખાઈ રહી છે.

📝 અહેવાલ: રાવલિયા મધુ, કેશોદ