🗳️ જૂનાગઢ જિલ્લાના શ્રમયોગીઓને ગ્રામ પંચાયત ચૂંટણીમાં મતાધિકાર ઉપયોગ માટે મળશે ખાસ રજા 📢

જૂનાગઢ, તા.૨૦:

આગામી ૨૨મી જૂન, ૨૦૨૫ – રવિવારના રોજ રાજ્યભરમાં યોજાનારી ગ્રામ પંચાયતોની ચૂંટણીમાં શ્રમયોગી અને કર્મચારીઓ પણ સરળતાથી મતાધિકારનો ઉપયોગ કરી શકે તે માટે ગુજરાત સરકારના પરિપત્રના આધારે ખાસ વ્યવસ્થા કરવામાં આવી છે.

જિલ્લાના ગુજરાત શોપ્સ એન્ડ એસ્ટાબ્લીશમેન્ટસ એક્ટ – ૨૦૧૯ હેઠળ નોંધાયેલા સંસ્થાઓને સૂચવવામાં આવ્યું છે કે ચૂંટણી અંતર્ગત આવેલા વિસ્તારમાં કાર્યરત શ્રમયોગીઓને મતદાન માટે ત્રણ કલાકની વારાફરતી વિશેષ રજા આપવામાં આવે.

વિકલ્પરૂપે, જો મતદાનનો દિવસ કર્મચારીની અઠવાડિક રજા હોય, તો તે દિવસે સંસ્થા ચાલુ રાખીને ૨૨મી જૂનના દિવસે બદલી રજા આપવા માટે પણ છૂટછાટ આપવામાં આવી છે.

જો કે પરિપત્ર મુજબ, આ સુવિધા તે જ કર્મચારીઓ માટે લાગુ થશે, જ્યાં ગેરહાજરી દરમિયાન કોઈ પણ પ્રકારની ભયજનક પરિસ્થિતિ કે વ્યાપક નુકશાન સર્જાય નહીં. આ નિયમો રોજમદાર અને કેજ્યુઅલ કામદારો માટે પણ લાગુ રહેશે.

જાહેરાતનુમા યાદીમાં સ્પષ્ટ જણાવ્યું છે કે મતદાન અધિકાર ન માત્ર લોકશાહીના પાયાનો હક છે, પરંતુ સરકાર શ્રમયોગીઓને આ હકનો ઉપયોગ કરવા પૂરતી તક મળે તે માટે કટિબદ્ધ છે.

🖊️ અહેવાલ: નરેન્દ્ર દવે સાથે જગદીશ યાદવ, જૂનાગઢ