🗳️ વિસાવદર પેટા ચૂંટણીમાં ૮૬-માલીડા અને ૧૧૧-નવા વાઘણીયા ખાતે નવેસરથી મતદાનની તૈયારી, જિલ્લા ચૂંટણી અધિકારીની અધ્યક્ષતામાં મહત્વપૂર્ણ બેઠક યોજાઈ 🌧️

જૂનાગઢ, તા.૨૦:

વિસાવદર વિધાનસભા પેટા ચૂંટણી અંતર્ગત ૮૬-માલીડા અને ૧૧૧-નવા વાઘણીયા મતદાન મથકો પર ૨૧ જૂન, ૨૦૨૫ના રોજ નવેસરથી મતદાન યોજાવાનું છે. ચૂંટણી પંચની સૂચના અનુસાર જિલ્લાના દરેક તબક્કે પદાધિકારીઓ દ્વારા ચૂંટણીની પૂર્વ તૈયારી શરૂ થઈ ગઈ છે.

આજરોજ જિલ્લા ચૂંટણી અધિકારી તથા કલેક્ટર શ્રી અનિલકુમાર રાણાવસિયાની અધ્યક્ષતામાં મહત્વની બેઠક યોજાઈ, જેમાં ચૂંટણીની કામગીરી માટે નિયુક્ત નોડલ અધિકારીઓએ હાજરી આપી.

દ્વારકાધીશ સભાગૃહમાં યોજાયેલ બેઠકમાં કલેક્ટરે ખાસ કરીને મતદારો સુધી ફરીથી મતદાન થનાર હોવાનું સંદેશ પહોંચે તે માટે ચૂકસ માહિતી આપવી અને રાજકીય પક્ષો તથા ઉમેદવારોને પણ અગાઉથી જાણ કરવા સૂચના આપી.

તેમણે કહ્યું કે,

“ચૂંટણીની તમામ નિયત પ્રક્રિયાઓનું પાલન ચોક્કસપણે થવું જોઈએ. મતદાનના દિવસે ઈવીએમ અને તમામ સામગ્રી યોગ્ય સમયે પહોંચાડવા માટે વ્યવસ્થિત આયોજન જરૂરી છે.“

અત્રે નોંધનીય છે કે સંભવિત વરસાદની સ્થિતિને ધ્યાનમાં રાખીને, કલેક્ટરે સ્થાનિક તંત્રને પૂર્વ તૈયારી માટે સૂચના આપી છે. સાથે જ બંને મતદાન મથકો પર વેબકાસ્ટિંગ સુવિધા, સુરક્ષા વ્યવસ્થા, તથા જમીન પર કાર્યરત સ્ટાફના તાલમેલ માટે તાકીદ કરી છે.

આ બેઠકમાં જિલ્લા વિકાસ અધિકારી શ્રી પટેલ, જિલ્લા પોલીસ વડા શ્રી સુબોધ ઓડેદરા, અધિક નિવાસી કલેક્ટર સુશ્રી કે.બી. પટેલ, નાયબ જિલ્લા ચૂંટણી અધિકારી ડી.જે. જાડેજા, અને અન્ય અધિકારીઓ ઉપસ્થિત રહ્યા હતા.

🖊️ અહેવાલ: નરેન્દ્ર દવે સાથે જગદીશ યાદવ, જૂનાગઢ