🗳️ વિસાવદર વિધાનસભા પેટા ચૂંટણી: મતગણતરી માટે બીજુ રેન્ડમાઈઝેશન, ૨૩ જૂને કૃષિ ઈજનેરી મહાવિધાલય ખાતે મતગણતરી યોજાશે

જૂનાગઢ, તા. ૨૦ જૂન:
૮૭-વિસાવદર વિધાનસભા પેટા ચૂંટણીની મતગણતરી માટે તંત્ર દ્વારા તૈયારીઓ તીવ્ર કરવામાં આવી છે. આગામી તા. ૨૩ જૂન ૨૦૨૫ના રોજ, જૂનાગઢ કૃષિ ઈજનેરી મહાવિધાલય ખાતે મતગણતરી યોજાવાની છે. તે પૂર્વે મંગળવારે બીજું રેન્ડમાઈઝેશન કરવામાં આવ્યું.

આ રેન્ડમાઈઝેશન પ્રક્રિયા જનરલ ઓબ્ઝર્વર ડો. હિરાલાલ તથા જિલ્લા ચૂંટણી અધિકારી અને કલેક્ટર અનિલકુમાર રાણાવસિયાની ઉપસ્થિતિમાં જૂનાગઢ કલેક્ટર કચેરી ખાતે પારદર્શક રીતે સંપન્ન કરવામાં આવ્યું.

બીજા રેન્ડમાઈઝેશનમાં માઈક્રો ઓબ્ઝર્વર, કાઉન્ટિંગ સુપરવાઈઝર અને કાઉન્ટિંગ આસિસ્ટન્ટનો સ્ટાફ પસંદ કરવામાં આવ્યો. ત્રીજું અને અંતિમ રેન્ડમાઈઝેશન મતગણતરીના દિવસે સવારે ૫ વાગ્યે હાથ ધરાશે, જેમાં ટેબલ ફાળવણી થશે અને સ્ટાફને નિયુક્તિ અંગે માહિતી આપવામાં આવશે.

આ રેન્ડમાઈઝેશન પ્રક્રિયામાં નાયબ જિલ્લા ચૂંટણી અધિકારી ડી.જે. જાડેજા, ડિસ્ટ્રિક્ટ ઇન્ફોર્મેટિક્સ ઓફિસર ભુવનેશ્વર બુડગયા તથા અન્ય વહીવટી અધિકારીઓ ઉપસ્થિત રહ્યા હતા.

ચૂંટણી પ્રક્રીયાની પારદર્શિતા જળવાઈ રહે અને મતગણતરી પ્રક્રિયા યોગ્ય અને નિયત સમયમાં સંપન્ન થાય તે માટે તંત્ર દ્વારા જરૂરી તમામ પગલાં લેવાયા છે.

📍અહેવાલ: નરેન્દ્ર દવે સાથે જગદીશ યાદવ, જૂનાગઢ