🗳️ ૮૭-વિસાવદર વિધાનસભા પેટા ચૂંટણીની મતગણતરી ૨૩ જૂને, કૃષિ ઈજનેરી અને ટેકનોલોજી કોલેજ, જૂનાગઢ ખાતે થશે

જુનાગઢ જિલ્લાના ૮૭-વિસાવદર વિધાનસભા પેટા ચૂંટણી-૨૦૨૫ માટે મતદાનની પ્રક્રિયા સફળતાપૂર્વક પૂર્ણ થયા પછી હવે તા. ૨૩ જૂનના રોજ મતગણતરી યોજાવાની છે. આ મહત્વપૂર્ણ ગણતરી કૃષિ ઈજનેરી અને ટેકનોલોજી કોલેજ, કૃષિ યુનિવર્સિટી, જૂનાગઢ ખાતે સવારે ૮ વાગ્યાથી શરૂ થશે.

જિલ્લા ચૂંટણી અધિકારી તથા કલેક્ટર શ્રી અનિલકુમાર રાણાવસિયાના દિશા-निर्दેશ હેઠળ મતગણતરી માટેની તમામ તૈયારીઓ પૂર્ણ કરવામાં આવી છે. સમગ્ર પ્રક્રિયા CCTV દ્વારા મોનીટર કરવામાં આવશે જેથી પારદર્શિતા જળવાઈ રહે.

મતગણતરી ૨૧ રાઉન્ડમાં ૨૯૪ મતદાન મથકો માટે કરવામાં આવશે, જેમાં ૧૪ ટેબલ પર કાર્ય ચાલશે. દરેક રાઉન્ડમાં માઈક્રો ઓબ્ઝર્વર, કાઉન્ટીંગ સુપરવાઈઝર અને સહાયક સુપરવાઈઝર સહિતનો સ્ટાફ તહેનાત રહેશે.

સૌપ્રથમ પોસ્ટલ બેલેટની ગણતરી હાથ ધરાશે, ત્યારબાદ ઈવીએમના મતોની ગણતરી શરૂ થશે. મોતબર હાજરીમાં મતગણતરી યોજાશે જેમાં ઓબ્ઝર્વરશ્રી, ઉમેદવારો અથવા તેમનાં અધિકૃત પ્રતિનિધિઓ પણ ઉપસ્થિત રહેશે.

આ મતગણતરી માટે અંદાજે 60 જેટલા સ્ટાફના કર્મચારીઓ ફરજ બજાવશે. સમગ્ર પ્રક્રિયા શાંતિપૂર્ણ અને સુચારુરૂપે પાર પાડી શકાય તે માટે તંત્ર સતર્ક છે.

📍 સ્થળ: કૃષિ ઈજનેરી અને ટેકનોલોજી કોલેજ, કૃષિ યુનિવર્સિટી, જૂનાગઢ
🕗 તારીખ અને સમય: 23 જૂન 2025, સવારે 8 વાગ્યાથી

📝 અહેવાલ: નરેન્દ્ર દવે સાથે જગદીશ યાદવ – જૂનાગઢ