🙏 મુક્તાનંદ બાપુના 67માં પ્રાગટ્ય દિવસે જુનાગઢમાં ગાયત્રી યજ્ઞ અને 67 દીવાની આરતીનો આયોજિત ભાવિક કાર્યક્રમ

જુનાગઢ, તા. 13 મે:
ક્રાંતિકારી સંત પ.પૂજ્ય મુક્તાનંદ બાપુના 67માં પ્રાગટ્ય દિવસ નિમિત્તે જુનાગઢમાં રાજગોર બ્રાહ્મણ મહિલા મંડળ દ્વારા ગાયત્રી શક્તિપીઠ ખાતે વિશેષ ધાર્મિક કાર્યક્રમોનું આયોજન કરવામાં આવ્યું હતું.

આ પુણ્ય તિથિને ઉજવવા માટે 13 મેના રોજ પંચકૂડી ગાયત્રી યજ્ઞ તથા 67 દીવા પ્રગટાવી ગાયત્રી આરતી યોજાઈ હતી. આ કાર્યક્રમમાં ગાયત્રી શક્તિપીઠના તમામ ટ્રસ્ટીઓ અને કર્મચારીઓએ ઉત્સાહપૂર્વક સહભાગી થઈ યજ્ઞને સફળ બનાવવામાં મદદરુપ બન્યા હતા.

કાર્યક્રમ દરમિયાન મેનેજીંગ ટ્રસ્ટી નાગભાઈ વાળાએ ખાસ હાજરી આપી કાર્યક્રમને બિરદાવ્યો હતો. યજ્ઞની અંતિમ આહુતિ ભારતના શહિદો અને આતંકવાદી હુમલામાં જીવ ગુમાવનાર નિર્દોષ નાગરિકોની આત્માને શાંતિ પ્રાપ્ત થાય તેમજ તેમના પરિવારજનોને શાંતિ અને સુખાકારી પ્રાપ્ત થાય તેવા શુભ આશયથી અર્પણ કરવામાં આવી.

આ સત્કાર્યમાં બહોળી સંખ્યામાં બહેનો ઉપસ્થિત રહી ગાયત્રી માતાની આરાધનામાં જોડાઈ. અંતે કાર્યક્રમની પૂણાહુતિ વખતે સંસ્થાની પ્રમુખ હંસાબેન યોગેશભાઈ મહેતાએ તમામ ઉપસ્થિત બહેનો અને સહયોગીઓનો હૃદયપૂર્વક આભાર વ્યક્ત કર્યો હતો.

આ શ્રદ્ધાભરી કાર્યક્રમને સફળ બનાવવામાં રાજગોર બ્રાહ્મણ મહિલા મંડળની બહેનોની નિષ્ઠા અને શ્રદ્ધાનો અભૂતપૂર્વ ઉમંગ જોવા મળ્યો હતો.

અહેવાલ: નરેન્દ્ર દવે સાથે જગદીશ યાદવ – જુનાગઢ