🛑 માળીયા હાટીના નજીક માર્ગ અકસ્માત: ટ્રેક્ટર નીચે આવી યુવાનનો કરૂણ મોત

માળીયા હાટીના :
માળીયા હાટીના તાલુકાના ચુલડીથી પાતળા વચ્ચેના માર્ગ પર આજે સવારે એક દુખદ અકસ્માત બન્યો હતો. ટ્રેક્ટરચાલકની બેદરકારી અને અતિવેગ કારણે નિર્ભય લખમણ રામ નામના યુવાનને ગંભીર ઇજાઓ પહોંચી હતી. તેમને તાત્કાલિક 108 એમ્બ્યુલન્સ મારફતે માળીયા હાટીની સરકારી હોસ્પિટલ ખસેડવામાં આવ્યા હતા, જ્યાં ડૉ. હિના ભાદરકાએ તેમને મૃત જાહેર કર્યા હતા.

નિર્ભય તેમના પરિવારનો એકમાત્ર પુત્ર હતો. ઘરમાં બે બહેનો હવે ભાઈ વિહોણી રહી છે. પરિવારજનોની આંખોનું પાણી અટકી ન રહ્યુ હોય તેવો હૈયાફાટ રુદન અને શોકભર્યો માહોલ હોસ્પિટલમાં જોવા મળ્યો.

ટ્રેક્ટર ડ્રાઈવરનો આબાદ બચાવ થયો છે અને અકસ્માત બાદ પોલીસ તપાસ શરૂ કરાઈ છે. નિર્ભયના મોત બાદ પોસ્ટમોર્ટમની કાર્યવાહી હાથ ધરવામાં આવી છે.

આ દુખદ ઘટનાની જાણ થતા સામાજિક કાર્યકર જીવા સીસોદીયા, પૂર્વ સરપંચ નટવર સિંહ સીસોદીયા, પ્રકાશ ધકેલ, નાનુ સિંધવ સહિતના અનેક ગામના આગેવાનો પણ હોસ્પિટલ ખાતે પહોંચ્યા હતા અને પરિવારજનોને સાંત્વના આપી.

સમગ્ર માળીયા હાટીના વિસ્તારમાં દુ:ખની લહેર ફેલાઈ ગઈ છે. લોકો આ ઘટના સામે ગુસ્સો વ્યક્ત કરી રહ્યા છે અને રોડ સલામતીના મુદ્દે કડક પગલાં લેવા માંગ કરી રહ્યા છે.

અહેવાલ:- પ્રતાપ સીસોદીયા, રિપોર્ટર – માળીયા હાટીના