🛵 જૂનાગઢ શહેરમાં ટ્રાફિક સમસ્યા નિવારવા પોલીસ તંત્રની પહેલપંચહાટડી ચોક અને માંગનાથ વિસ્તારમાં પાર્કિંગ માટે નવી વ્યવસ્થા અમલમાં

જૂનાગઢ, તા.16:
જૂનાગઢ શહેરના મુખ્ય માર્કેટ વિસ્તારોમાં ટ્રાફિક સમસ્યાના નિવારણ માટે શહેર ટ્રાફિક શાખાએ પ્રવૃત્તિમૂલક પગલાં લીધાં છે. R.I.G. નીલેશ જાજડીયા તથા I/C એસ.પી. બી.યુ.જાડેજાના સુચનો અને ડી.વાય.એસ.પી. હિતેષ ધાંધલ્યાના માર્ગદર્શન હેઠળ ટ્રાફિક શાખાના પી.આઇ. બી.બી. કોળીની આગેવાનીમાં આ કામગીરી હાથ ધરવામાં આવી છે.

શહેરના પંચહાટડી ચોક અને માંગનાથ વિસ્તારમાં રોજબરોજની ટ્રાફિક જમાવટને ધ્યાને લઇ ટ્રાફિક શાખાએ સર્વે હાથ ધર્યો હતો. આ દરમિયાન એક વિશેષ ઉકેલ સ્વરૂપે આઝાદ ચોક લાઇબ્રેરી પાસે, પોસ્ટ ઓફિસની બાજુમાં આવેલી જલારામ મંદિરની જગ્યા ટુ-વ્હિલર પાર્કિંગ માટે ઉપલબ્ધ કરાવાઈ છે. આ માટે જલારામ મંદિરના ટ્રસ્ટી અને ભૂતપૂર્વ ધારાસભ્ય મહેન્દ્રભાઈ મશરૂએ જગ્યાનો સકારાત્મક ઉપયોગ કરવાની મંજૂરી આપી છે.

ત્રણ મુખ્ય વિસ્તારો — આઝાદ ચોક, પંચહાટડી અને માંગનાથ —ના વેપારીઓ તેમજ ખરીદી માટે આવતા નાગરિકોને અપીલ કરવામાં આવી છે કે, તેઓ પોતાના ટુ-વ્હિલર વાહનો જલારામ મંદિર પાસે અથવા મહાનગરપાલિકા સામે ડબ્બા ગલીની અંદર પાર્ક કરીને ટ્રાફિક સમસ્યાના નિવારણમાં સહયોગ આપે.

આ નવી વ્યવસ્થા અમલમાં આવતાં, સ્થાનિક વેપારીઓ અને નાગરિકોને રાહત મળશે તથા શહેરી વ્યવસ્થામાં સુધારો થાય તેવી આશા છે.

અહેવાલ : નરેન્દ્ર દવે સાથે જગદીશ યાદવ, જૂનાગઢ