🟠 રોણાજ ગામે રાત્રિસભા : કલેક્ટર એન.વી. ઉપાધ્યાયે આપી ત્વરિત નિરાકરણની હાકલ

રોણાજ, .વેરાવળ:
જિલ્લા કલેક્ટર એન.વી. ઉપાધ્યાયના અધ્યક્ષસ્થાને રોણાજ ગામે રાત્રિસભાનું આયોજન કરવામાં આવ્યું હતું. મોટી સંખ્યામાં ઉપસ્થિત રહેલા ગ્રામજનોના પ્રશ્નો સાંભળીને કલેક્ટરશ્રીએ ત્વરિત નિરાકરણ માટે અધિકારીઓને સ્પષ્ટ સૂચનાઓ આપી હતી.

ગામજનોના પ્રશ્નો અને કલેક્ટરશ્રીની કાર્યવાહી
રાત્રિસભામાં મીતિયાજ, કરેડા, છાછર, દૂદાણા, દેવલપુર સહિતના ગામના લોકોએ વારસાઈ સર્ટિફિકેટ, સ્કૂલ રેકોર્ડ, ચેકડેમ અને દબાણના મુદ્દાઓ ઉઠાવ્યા. કલેક્ટર ઉપાધ્યાયે દરેક રજુઆત સંભાળીને સંબંધિત વિભાગોને સમયમર્યાદામાં કાર્યવાહી કરવા આદેશ આપ્યો.

કલેક્ટરશ્રીએ પીએચસીમાં પાણીની સુવિધા, જન્મ-મરણ નોંધણી, વિધવા-વૃદ્ધ સહાય યોજનાઓ, આયુષ્માન કાર્ડ અને વેક્સિનેશન અંગે પણ વિસ્તૃત માહિતી મેળવી અને જનહિત માટે ગ્રામીણજનોને સરકારની યોજનાનો લાભ લેવા આહવાન કર્યું.

અધિકારીઓની ઉપસ્થિતિ અને માર્ગદર્શન
જિલ્લા વિકાસ અધિકારી સ્નેહલ ભાપકરે સ્વચ્છતા મિશન, ઈ-વ્હીકલ અને વેરા વસૂલાત અંગે માર્ગદર્શન આપ્યું.
ગ્રામસભામાં જિલ્લા ગ્રામ વિકાસ એજન્સીના નિયામક યોગેશ જોશી, પ્રાંત અધિકારી કે.આર. પરમાર, નાયબ જિલ્લા વિકાસ અધિકારી ડી.પી. ચૌહાણ, ડીવાયએસપી ચૌધરી, જિલ્લા પ્રાથમિક શિક્ષણ અધિકારી અશોક પટેલ, તેમજ આરોગ્ય અને આંગણવાડી વિભાગના અધિકારીઓ હાજર રહ્યા હતા.

આ રાત્રિસભા વિધાનસભા વિસ્તારના વિકાસ અને નાગરિકોના પ્રશ્નોના ત્વરિત ઉકેલ માટે મહત્વપૂર્ણ સંવાદપ્લેટફોર્મ બની રહી હતી.

🖋️ અહેવાલ : પ્રકાશ કારાણી, વેરાવળ