🧘‍♀️ સોમનાથ ચોપાટી ગ્રાઉન્ડ ખાતે ‘વિશ્વ યોગ દિવસ’ની ભવ્ય ઉજવણીની તૈયારી, જિલ્લા કક્ષાએ બે લાખથી વધુ નાગરિકો યોગ સાથે જોડાશે

વેરાવળ:
વિશ્વભરમાં મનાવવામાં આવતો “આંતરરાષ્ટ્રીય યોગ દિવસ” ૨૧મી જૂને ભવ્ય રીતે ઉજવાશે તે માટે ગુજરાતના સોમનાથ જિલ્લામાં સઘન આયોજન હાથ ધરવામાં આવ્યું છે. આ ઉજવણી સંદર્ભે કલેક્ટર એન.વી. ઉપાધ્યાયના અધ્યક્ષસ્થાને વેરાવળ પ્રાંત કચેરી ખાતે પ્રેસ કોન્ફરન્સ યોજાઈ હતી.

કલેક્ટરે જણાવ્યું કે, સમગ્ર જિલ્લામાં યોગના જાગૃત ભાવ સાથે ૨ લાખથી વધુ નાગરિકો યોગાભ્યાસ સાથે જોડાવાના અણધાર્યા ઉમંગ સાથે તૈયાર છે. આ વર્ષે યોગ દિવસની થીમ “એક પૃથ્વી – એક સ્વાસ્થ્ય માટે યોગ” નક્કી કરવામાં આવી છે.

પ્રથમ જ્યોતિર્લિંગ ધરાવતા પવિત્ર સોમનાથ મંદિર નજીક ચોપાટી ગ્રાઉન્ડ ખાતે યોજાનાર મુખ્ય કાર્યક્રમમાં ગુજરાત સંસ્કૃત બોર્ડના ચેરમેન હિમાંજય પાલીવાલ પણ ઉપસ્થિત રહેશે.
આ પ્રસંગે શાળાઓ, કોલેજો, આરોગ્ય કેન્દ્રો, સ્વૈચ્છિક સંસ્થાઓ, ઉદ્યોગો અને યોગસાધકો સહિત મોટા પ્રમાણમાં નાગરિકો જોડાશે.

કલેક્ટરે જણાવ્યું કે, યોગ માત્ર એક દિવસ નહીં, પણ જીવનશૈલીનો અભિન્ન ભાગ હોવો જોઈએ, જેના થકી શારીરિક તેમજ માનસિક સ્વાસ્થ્ય સુધારી શકાય છે.

તાલુકા અને નગરપાલિકા કક્ષાએ પણ સમાંતર કાર્યક્રમો યોજાશે. વિવિધ સ્થળો જેમ કે:

• કોડીનાર નગરપાલિકા ગાર્ડન
• સુત્રાપાડામાં કારડીયા રાજપૂત સમાજની વાડી
• તાલાળામાં લોહાણા મહાજનવાડી
• વેરાવળની સોમનાથ સંસ્કૃત યુનિવર્સિટી
• ઉના અને દ્રોણેશ્વર સ્વામિનારાયણ ગુરુકુલ
  આ વિસ્તારના નાગરિકો પણ યોગદિનમાં જોડાશે.

ઉલ્લેખનીય છે કે, વડનગર ખાતે રાજ્ય કક્ષાનો મુખ્ય કાર્યક્રમ યોજાશે અને તેનું જીવંત પ્રસારણ સમગ્ર જિલ્લામાં પ્રસારિત કરવામાં આવશે.

પ્રેસ કોન્ફરન્સ દરમ્યાન જિલ્લા વિકાસ અધિકારી સ્નેહલ ભાપકર, પોલીસ અધિક્ષક મનોહરસિંહ જાડેજા, પ્રાંત અધિકારી વિનોદ જોશી સહિત વિવિધ અધિકારીઓ તેમજ પત્રકારો ઉપસ્થિત રહ્યાં હતાં.

📍અહેવાલ: પ્રકાશ કારાણી, વેરાવળ