🪷 બાબા સાહેબની વિચારધારાને સાકાર કરવા માટે બારડોલી ખાતે ભારતીય જનતા પાર્ટી દ્વારા પ્રબુદ્ધ નાગરિક સન્માન સભા યોજાઈ 🪷

ડૉ. આંબેડકર જન્મજયંતિ નિમિત્તે સિનિયર સિટીઝન ક્લબ બારડોલી ખાતે યોજાયો ભવ્ય કાર્યક્રમ – પૂર્વ મેયર હેમાલીબેન બોઘાવાલા અને પ્રદેશ ઉપપ્રમુખ જનકભાઈ બગદાણા મુખ્ય વક્તા તરીકે ઉપસ્થિત

સુરત જિલ્લો, બારડોલી:
ભારતીય જનતા પાર્ટી, જિલ્લા સુરત દ્વારા ભારતના બંધારણના શિલ્પકાર અને સામાજિક સમરસતા ના મેસેન્જર, ભારત રત્ન ડૉ. ભીમરાવ આંબેડકરજીની જન્મજયંતિ નિમિત્તે પ્રબુદ્ધ નાગરિક સન્માન સભાનું આયોજન બારડોલી સ્થિત સિનિયર સિટીઝન ક્લબ ખાતે કરવામાં આવ્યું.

આ સન્માનસભાનું અધ્યક્ષ સ્થાન જિલ્લા પ્રમુખ શ્રી ભરતભાઈ રાઠોડએ ભજવ્યું હતું. કાર્યક્રમાં મુખ્ય વક્તા તરીકે પૂર્વ મેયર શ્રીમતી હેમાલીબેન બોઘાવાલા તથા ગુજરાત પ્રદેશ ભાજપાના ઉપપ્રમુખ શ્રી જનકભાઈ બગદાણા ઉપસ્થિત રહ્યા હતા.

કાર્યક્રમની શરૂઆત મહામંત્રી તથા સંયોજક શ્રી કિશનભાઈ પટેલના ઉદઘાટન પ્રવચનથી થઈ. ત્યારબાદ વર્ષો સુધી ભાજપા કાર્યકર્તા તરીકે નિષ્ઠાપૂર્વક સેવા આપનાર નાનુભાઈ સોંલકી, બાલુભાઈ હળપતિ, ચંદુભાઈ પટેલ, બચ્ચુભાઈ પટેલ, બાલુભાઈ પટેલ અને પાનાચંદ ગામીતને વિશિષ્ટ સન્માન એનાયત કરવામાં આવ્યું.

હેમાલીબેન બોઘાવાલાએ પોતાના ઉદબોધનમાં જણાવ્યું હતું કે, “ભાજપા એ હંમેશા પોતાના કાર્યકરોના ત્યાગ અને પરિશ્રમનું સાચું મૂલ્યાંકન કર્યું છે. આ કાર્યક્રમ એ તેનું જીવંત ઉદાહરણ છે.“

તે બાદ શ્રી જનકભાઈ બગદાણાએ પોતાનું પ્રાસંગિક ભાષણ આપતાં કહ્યું કે, “ભાજપાએ ડૉ. આંબેડકરજીને પંચતીર્થ બનાવીને જે શ્રદ્ધાંજલિ અર્પી છે, તે અત્યાર સુધીના ઈતિહાસમાં અનોખી છે. કોંગ્રેસે માત્ર તેમનું અપમાન કર્યું, જ્યારે ભાજપાએ ખરું સન્માન આપ્યું છે.“

અંતે જિલ્લા પ્રમુખ શ્રી ભરતભાઈ રાઠોડએ જણાવ્યું કે, “જેમણે આપણું બંધારણ ઘડ્યું, એવા મહાનાયકોની જાણકારી દરેક કાર્યકર પાસે હોવી જોઈએ. ઇતિહાસ ભૂલનારા સમાજો માટે ભવિષ્ય હમેશાં અનિશ્ચિત રહે છે.“

આ અવસરે બારડોલી વિધાનસભાના ધારાસભ્ય શ્રી ઈશ્વરભાઈ પરમાર, મહુવા વિધાનસભાના ધારાસભ્ય શ્રી મોહનભાઈ પટેલ, જિલ્લા મહામંત્રીશ્રીઓ જીગરભાઈ નાયક, કિશનભાઈ પટેલ, રાજેશભાઈ પટેલ, સહસંયોજક રાકેશભાઈ કંથારિયા, તથા વિશિષ્ટ મહેમાનો તરીકે જગદીશભાઈ પારેખ, ભાવેશભાઈ પટેલ, રિદ્ધિ પટેલ અને અનેક હોદેદારો, કાર્યકર્તાઓની ઉપસ્થિતિ રહી.

આભારવિધી જીગરભાઈ નાયકે કરી હતી જ્યારે સંચાલન શ્રી અજિતસિંહ સુરાંમ દ્વારા કરવામાં આવ્યું હતું.

અહેવાલ: સંતોષ જયસવાલ, સુરત ગ્રામ્ય