🔴 સુરતમાં ઓપરેશન શિલ્ડ અંતર્ગત અંધારપટનો જીવંત અનુભવ, નાગરિકો ઉત્સાહભેર જોડાયા

સુરત, તા. ૩૧ મે:
ભારત સરકારના ગૃહ મંત્રાલય દ્વારા દેશભરમાં અમલમાં મુકાયેલ “ઓપરેશન શિલ્ડ” અંતર્ગત સુરત શહેરમાં યોજાયેલ મોકડ્રીલના બીજા તબક્કામાં રાત્રે ૮:૦૦ થી ૮:૩૦ કલાક સુધી શહેરવ્યાપી બ્લેકઆઉટ યોજાયો હતો.
આ અવસરે સુરતના નાગરિકો, સરકારી તંત્ર, હોસ્પિટલ અને મ્યુનિસિપલ તંત્ર દ્વારા ઉત્સાહપૂર્વક સહભાગી બનીને રાષ્ટ્રીય સુરક્ષા માટે પ્રતીકરૂપ એવી આ મુકડ્રીલને સફળતાપૂર્વક પાર પાડવામાં આવી હતી.

મોકડ્રીલ અંતર્ગત રાત્રે ઠીક ૮ વાગ્યે શહેરભરમાં સાઇરન વાગીને બ્લેકઆઉટનો સંકેત આપવામાં આવ્યો હતો.
સાઇરનના અવાજ સાથે જ નાગરિકોએ પોતપોતાના ઘરો, દુકાનો, ઓફિસોની લાઈટો બંધ કરી અંધારપટ પાળ્યો હતો.
આ સમયગાળા દરમિયાન જાહેર વિસ્તારોની સ્ટ્રીટ લાઈટો, સરકારી કચેરીઓ અને સિવિલ હોસ્પિટલમાં પણ લાઈટ બંધ રાખી તંત્ર દ્વારા સંપૂર્ણ સહકાર દર્શાવવામાં આવ્યો હતો.

આ બ્લેકઆઉટ દરમિયાન કોઈપણ પ્રકારની શંકાસ્પદ હલચલ કે તાકીદની સ્થિતિ સામે તંત્રની તૈયારી પણ પરખવામાં આવી, જેથી આવનારા સમયમાં આપત્તિ સમયે ઝડપી પ્રતિસાદ મેળવી શકાય.
સુરત મ્યુનિસિપલ કોર્પોરેશન, પોલીસ વિભાગ, દમકલ વિભાગ તથા જિલ્લા વહીવટી તંત્ર સહિતના તમામ મહકમોએ બ્લેકઆઉટ દરમિયાન સંકલનપૂર્વક કામગીરી સંભાળી.

બ્લેકઆઉટનું સમાપ્તી સંકેત રાત્રે ૮:૩૦ વાગ્યે બીજી વાર સાઇરન વગાડી આપવામાં આવ્યો, ત્યારબાદ નાગરિકોએ ધીરે ધીરે રાબેતા મુજબ પોતાની સામાન્ય દિનચર્યા શરૂ કરી હતી.
આ સંપૂર્ણ પ્રક્રિયા શિસ્તબદ્ધ અને આયોજનબદ્ધ રીતે પસાર થઈ, જે સુરતવાસીઓની જાગૃતિ અને રાષ્ટ્રપ્રેમનું જીવંત ઉદાહરણ બની રહી.

📌 બ્લેકઆઉટનું મુખ્ય હેતુ શું હતું?

આ પ્રકારનો બ્લેકઆઉટ/mock drill યોજવાનો મુખ્ય હેતુ એ છે કે, યુદ્ધ જેવી પરિસ્થિતિમાં કે જ્યારે દુશ્મન દેશ દ્વારા હુમલો થાય ત્યારે નગરમાં પ્રકાશ અટકાવીને હુમલાખોરોને દિશા અને નિશાન બનાવવામાં મુશ્કેલી પડે.
સાથે જ, લોકોમાં સતર્કતા અને સંકટ સમયની તૈયારી અંગે જાગૃતિ લાવવી પણ આ અભિયાનનો મુખ્ય હેતુ રહ્યો છે.

તંત્ર દ્વારા મળેલી માહિતી અનુસાર, સુરત શહેરમાં યોજાયેલ આ બીજા તબક્કાની મોકડ્રીલ ૧૦૦ ટકા સફળ રહી, અને આગામી સમયમાં આવા કાર્યક્રમો દ્વારા નાગરિકોને વધુ જાગૃત અને સક્રિય બનાવવાના પ્રયાસો કરવામાં આવશે.