કેશોદ:
આજરોજ કેશોદના આંબાવાડી વિસ્તારમાં આવેલ લોહાણા વિદ્યાર્થી ભવન ખાતે નિઃશુલ્ક ગાયનેક સેમિનારનું સફળ આયોજન કરવામાં આવ્યું હતું. મહિલા આરોગ્ય અને સામાજિક જાગૃતિ માટે યોજાયેલા આ કાર્યક્રમમાં શહેરની અનેક બહેનો મોટી સંખ્યામાં ઉપસ્થિત રહી હતી.
કાર્યક્રમની શરૂઆત હેપી ધનેશાએ મહેમાનોના સ્વાગત સાથે કરી હતી. મહેમાનોને પુષ્પગુચ્છ અને મોમેન્ટો આપી સન્માનિત કરવામાં આવ્યા હતા. સેમિનારમાં વક્તા તરીકે જાણીતા તબીબો ડૉ. નિશાબેન જોશી, ડૉ. પ્રજ્ઞાબેન ધનેશા તથા ડૉ. શ્રુતિબેન વણપરીયા હાજર રહ્યા હતા. ત્રણે વક્તાઓએ બહેનો અને દીકરીઓમાં સામાન્યપણે જોવા મળતાં શારીરિક સમસ્યાઓ વિષે વિસ્તૃત માહિતી આપી હતી તથા તેના નિવારણ અંગે મહત્વપૂર્ણ માર્ગદર્શન આપ્યું હતું.
આ ઉપરાંત, ડૉ. રમાબેન દેવાણીએ મહિલાઓની સામાજિક સમસ્યાઓ અંગે ચર્ચા કરી અને સમાજમાં તેના ઉકેલ માટે માર્ગ દર્શાવ્યો હતો. ઇન્દુબેન જોષીએ પણ પોતાના મનોહર ગીત દ્વારા ઉપસ્થિત બહેનોના મનને સ્પર્શ કરી લીધું હતું.
કાર્યક્રમમાં ખાસ મહેમાન તરીકે બ્રહ્મ સમાજના આગેવાન, જૂનાગઢ મહિલા મોરચાની મહામંત્રી મમતાબેન રાવલ, દુર્ગા વાહિની માતૃશક્તિની તાલુકા પ્રમુખ હેતલબેન દવે તથા ગાંધીનગરથી પધારેલ નયનાબેન રામાણી ઉપસ્થિત રહ્યા હતા. તમામ મહેમાનોએ મહિલાઓની સામાજિક ભૂમિકા અંગે જાગૃતિ spread કરતાં પ્રેરક સંબોધન આપ્યું હતું.
આ સમગ્ર કાર્યક્રમના આયોજન અને સફળતા પાછળ સોનલ સોઢા તથા હેપી ધનેશાની મહત્વપૂર્ણ ભૂમિકા રહી હતી. કાર્યક્રમના અંતે હાજર બહેનોને યાદગાર રૂપે ગિફ્ટ્સ આપવામાં આવ્યા હતા.
અહેવાલ: રાવલિયા મધુ – કેશોદ
