ખેડબ્રહ્મા:
વિશ્વની સૌથી મોટી રાજકીય પાર્ટી ભારતીય જનતા પાર્ટીનો ૪૬મો સ્થાપના દિવસ ખેડબ્રહ્મામાં ભવ્ય રીતે ઉજવાયો. તારીખ ૮ એપ્રિલ, ૨૦૨૫ના રોજ ખેડબ્રહ્મા, વિજયનગર અને પોશીના તાલુકાના સક્રિય સભ્યો માટે વિશાળ સંમેલનનું આયોજન કરવામાં આવ્યું હતું. આર્ટ્સ અને કોમર્સ કોલેજના હોલમાં યોજાયેલા કાર્યક્રમમાં પાંચસોથી વધુ કાર્યકરો ઉપસ્થિત રહ્યા.
કાર્યક્રમની શરૂઆત મહેમાનોના દીપપ્રાગટ્ય સાથે થઈ હતી. પૂર્વ ધારાસભ્ય અશ્વિનભાઈ કોટવાલના સ્વાગત પ્રવચન બાદ રાજ્યસભાના સાંસદ રમીલાબેન બારા, લોકસભાના સાંસદ શોભનાબેન બારૈયા અને જિલ્લા પ્રમુખ કનુભાઈ પટેલે ઉદબોધન આપ્યું.
મુખ્ય વક્તા તરીકે હાજર રહેલા અરવલ્લી જિલ્લા ભાજપ પ્રમુખ રાજુભાઈ પટેલે ભાજપની વિકાસ યાત્રા, વિવિધ યોજનાઓ તથા રાષ્ટ્રીય એકતા તરફના પ્રયત્નો અંગે વિસ્તૃત માહિતી આપી હતી.
આ પ્રસંગે મહામંત્રી લુકેશભાઈ સોલંકી, ખેડબ્રહ્મા નગરપાલિકા પ્રમુખ પ્રિયંકાબેન ખરાડી, નટવરસિંહ બાપુ, માર્કેટ યાર્ડ પ્રમુખ હીરાભાઈ પટેલ, સહકારી નેતા જશુભાઈ પટેલ સહિત અનેક આગેવાનો હાજર રહ્યા.
સમાપ્તે વરિષ્ઠ કાર્યકર વાલજીકાકા પટેલે આશીર્વચન પાઠ્યા અને કાર્યકરોને સંગઠનની મજબૂતી માટે કાર્યશીલ રહેવા પ્રેરણા આપી.
આ ભવ્ય કાર્યક્રમ એ સ્પષ્ટ સંકેત આપે છે કે ભાજપની સભ્યશક્તિ અને સંગઠનશક્તિ ગ્રામ્ય વિસ્તારોમાં પણ ગાઢ છે અને ભાવિ રાજકીય પ્રવૃત્તિઓ માટે માટી તૈયાર છે.
અહેવાલ: ગુજરાત બ્યુરો
