ગીર સોમનાથ જિલ્લામાં છેલ્લા બે દિવસથી મેઘરાજા ધોધમાર વરસી રહ્યા છે. જિલ્લામાં અનેક વિસ્તારોમાં સતત ભારે વરસાદને કારણે નદી-નાળા ઉફાન પર આવી ગયા છે. વરસાદની અસર એટલી તીવ્ર છે કે તંત્ર એલર્ટ થઇ ગયું છે.
સોમનાથ, વેરાવળ, તલાલા અને કોડીનાર સહિતના તાલુકામાં ભારે વરસાદ વરસતા ગ્રામ્ય વિસ્તારોમાં પાણી ભરાઇ જવાથી ખેડૂતો અને સામાન્ય લોકો મુશ્કેલીમાં મુકાયા છે. ખેતરો પાણી નીચે તણાઈ ગયા છે, તો અનેક ગામોમાં ઘર-આંગણે પાણી ઘુસી જતાં દૈનિક જીવન ખોરવાઈ ગયું છે.
જિલ્લા કલેક્ટર દ્વારા જાહેર કરાયેલા એલર્ટ મુજબ નદી-નાળા પાસે કે નીચાણવાળા વિસ્તારમાં જવાનું ટાળવા માટે લોકોને અપીલ કરવામાં આવી છે. ખાસ કરીને માછીમારોને દરિયામાં ન જવા ચેતવણી આપવામાં આવી છે, જ્યારે દરિયામાં ગયેલી બોટ્સને તરત જ પરત ફરવા માટે તંત્રએ સૂચના આપી છે.
આકસ્મિક પરિસ્થિતિમાં તંત્ર દ્વારા ડિઝાસ્ટર કંટ્રોલ રૂમ કાર્યરત કરાયો છે, જેમાં નાગરિકો સહાય માટે સંપર્ક કરી શકે છે. તંત્રએ જાહેર કરેલા ટોલ ફ્રી નંબર ૧૦૭૭ પર લોકો મદદ મેળવી શકે છે.
આકાશીય વીજળી પડવાના બનાવો પણ નોંધાયા છે, જેના કારણે લોકોને ખુલ્લી જગ્યાએ કે ઝાડ નીચે ન ઊભા રહેવા અનુરોધ કરવામાં આવ્યો છે. જિલ્લામાં ગ્રામ્ય માર્ગો પર વાહન વ્યવહાર ખોરવાઈ જતાં મુસાફરોને પણ ભારે હાલાકીનો સામનો કરવો પડી રહ્યો છે.
જિલ્લા વહીવટી તંત્ર અને સ્થાનિક નાગરિકોએ સંયમ રાખીને પરિસ્થિતિનો સામનો કરવા માટે સજાગ રહેવું જરૂરી બન્યું છે. જો વરસાદનો જોર યથાવત્ રહેશે તો આવનારા દિવસોમાં પરિસ્થિતિ વધુ વિકટ બની શકે છે.
